Intanpui – Mizo Zia

By Lalchhandama Colney
Ph – 9862982321

Vawiina kan thupui tur hi a phurawm hle mai, kan that lohna leh fel lohna lai hi kan hre tam in, chhiar tam thin hle mai, chutih laia thatna lam han sawi chu chakawm pawh a chakawm e.
Mizo ten kan hnam zia, tih dan phung leh chin thin tha tak tak te kan hloh nasa tawh a, han indem ngawt theih pawh a ni chuang lo. Khawvel hmasawn zelin min hrut tel ve zel a, kan tih dan thinte tihdanglam, siam that a lo ngaih zel avangin Mizote kan dal lo thei lo a ni. Hnam dangte pawh hi an ni ve ngei turah ngai ila; mahse, hnam changkang tak tak te chuan an hnam tih thin dan, zia, te chu vawiin thlengin an la chawi nung zel tho a ni. Mizote kan han insit viau thin tak na a, Mizo nula, Mizo tlangval, fel tak tak leh ril tak tak hi an awm ve teuh tho a ni. Tun laia kan buai thinna ber pakhat chu ei leh barah kan intodelh ta tlat lo mai hi a ni. Kan changkang viau, lehkhathiamte pawh kan tam, kan khaw hawi te pawh a zau, mahse, Silchar kawng a pin chuan chuti hlauh chu kan ni si. Aw le, kan thusawi tum lam hawiin i’n kal zel dawn teh ang.
Hnam Dang – Hnam dang han tih hian kan rilrua lang hmasa ber chu vai, kan tih hote hi a ni. Anni ho hian tlawmngaihna, midangte puih chaknate an neih em em kan hre lo. Vai rama han zina thil hrehawm ve deuh pakhat chu fimkhur ngai em em thin hi a ni. Min tanpui chu sawi loh, a remchan phawt chuan min rawk chhe zo vek duh zel a ni. Hetih lai hian vai fel tak tak an awm ve bawk a, tanpui ngai te eng mah phut nei loin zankhuaa buaipui peih te pawh an awm ve bawk. A tlangpui thuin vai kan tih hote hi rin ngam an harsa, min bum mai ang tih a hlauhawm a ni. Midangte tanpuitu pawl hi chu an awm vein ka hria ,mahse, keini ram atang chuan kan zu hre vak lo a ni mai thei. Ram pawn lam han thlir leh ta ila, ram hausaten tanpui ngai an tanpui dan te kan hre hlawmin ka ring. Keini India ram ngei pawh hian tanpuina dollar million eng emaw zah a sem chhuak ve fo a ni. Keini Mizote mahin tanpui ngaite kan tanpui thin chuan keini aia hnam fing leh ropui zawkte chuan ti nasa turah ngai ila. Kan hnam ze mil zelin tih dan kan nei theuh niin a hriat. Tute Nge Kan Nih – Mizote tute nge maw kan nih le, vai thlah chu kan ni lo, zirmite sawi dan chuan Mongolian lam chhul chhuak kan ni, an ti. Kan pipute hun lai chuan hnam intodelh ve tak kan ni a, khawtlang inrelbawlna fel tak nei thin kan ni. Hmeithaite an chhawmdawl a, tanpui ngaite eng hun leh hmunah pawh an tanpui thin. Hnam zalen tak kan ni a, thenawm khawvengte sa kan inhleh a, chawhmeh te pawh kan in suah liam liam thin. Hun a lo kal zel a, Kristian kan lo nih hnu hian chung kan ze neih sate chu kristian inzirtirna nen a lo inzul hle. Mahse, tun hnu hian Mizote pawh kan lo danglam ve tawh nasa, kan thil te a bo a, kan ru bawk a, zu kan rui a, hmeichhe inzuarte pawh kan lo kat ve ta nuk mai. Mizo tlawmngaihna kan tih te pawh chu hmuh tur a tam ta lo hle mai, kan inchuh a, kan innawr a, dawtin kan inpuh bawk a. Sem sem dam dam eibil thi thi, tih te pawh chu thawnthu hlui ang chauh in kan hre tawh a ni. Mizote, Mizo chu kan la ni a, mahse, modern Mizo,a hming mai mai a ang tawh khawp mai. A va Ropui Em – Khawvel hmun dangte ang bawkin Mizoram pawh covid hriin min nuai ve ta, a darh chak si, inkai a awlsam bawk si, kan buai ve kher mai. Sawrkarin loh theih lohna avangin total lockdown an puang a, kar hnih te a lo tlin chuan mipui kan tam ta tlat mai, pawn chhuah theih si loh, dawr/bazar, inhawng awm bawk si lo. Hetih lai hian kan rinlohna lam daih atangin tanpuina a lo kal ta!! Zokhaw lama kan unaute chuan an thlai thar chi hrang hrang a thlawnin an rawn thawn lut ta zut zut mai. Tichuan, a lian ber atanga te ber thlengin chawhmeh eitur kan nei leh ta, a va lawmawm dangdai em!! Keini chhung ngei pawh chu hriin min man ve ta, inkhung hran a ngai, chhuah theih bawk si loh. Eng nge kan ei tak ang aw, kan tih mek lai chuan thenawm khawvengte chuan, hei aw, alu, mai-an, sa thlengin min rawn pe hlawm ta. Mizo zia a awm tawh lo, thi tawh ni hiala ka lo hriat, intanpui tawn, chawhmeh inpek te chu a lo nung thar leh ta tlat mai, a va ropui em!! Mizo nih a lo va hahdamthlak em. Hei lo pawh hi zonun ze mawi a lo lang chhuak nual mai, a va thlamuanthlak em. Pathian zarah covid hri pawh reh chho zel turah ngai ila. Thawh hnihnaina India ram a’n tuam tak tak kha chu, T.V. velah i lo hmu ve ngeiin ka ring, mitthi kha an vui seng lo, ruang halna hmuna kal tur khan an intlar put a nih kha. Tute emaw fiamthuah pawh, China chuan mihring vanthengrengah a kap kai a, India ve thung chuan vanramah, an ti. Kha tih lai khan China sawrkar chuan space-ah mihring a kap chho a, hri kha an la tuar ve lutuk lo hrih a ni. Nia, India sawrkar buaizia hriain ram dang atangin tanpuina a lo lut ta ruih ruih mai a, mitthi zat tlemin a tlem hret a, hri kai thar zat erawh ni tin nuaih a chuang ziah a ni. Aw le, kan Mizo zia tam tak chu a hman theih tawh lo a, kan tun lai khawvel nen a inmil tawh lo a ni. Hetih lai hian kan hnam zia, tih dan, etc. te humhalhtu, sawrkar department, Y.M.A., M.U.P., M.H.I.P., etc.,te an tha kan tih chak a, kan tawiawm that a pawimawh hle. Mizote hnam tlem kan ni a, chimral mai pawh kan awl hle ang, chuvang chuan, hnama kan chian a, kan insanphek ve a ngai a ni. Kan zia tam tak hi chu tul tawh lo mah se, kan hriatreng tho a va pawimawh em, Mizote Mizo nih tinuamtu chu khangte kha a nih thin avangin, intanpui – Mizo zia, a lo ni e.