Zanin zan lai dar 12:30-ah inkhel hmuhnawm tak en tur a awm dawn a, Inter Milan leh FC Bacelona te Champions League final lut turin an inchingfel dawn.
Semi-final thawhkhatna, inkhel hmuhnawm takah Inter Milan leh FC Barcelona te hi 3-3 in an lo inhnehtawk tawh. Barcelona mualah goal thum ngawt an thun theih vangin Inter Milan hian an mualah chak turin inrintawkna sang tak an nei. An mualah chak a, final an lut thei a nih chuan champion turin an inringtawk zui hle ngei dawn.
Barcelona muala semi-final thawhkhatna khelh a nih tumin La Liga hmahruaitu Barca in ball an chang tam viau a, game an thunun hneh hle. Ball chang tlem zawk ni bawk mah se Inter Milan in goal thum ngawt an thun thei tho thung. Pumraw lian leh thahrui ngah zawk an nihna Inter hian an chhawr tangkai thei viau tura ngaih a ni a. |antu ngah zawk an nih dawn vangin chak theihna chance nei sang zawk an ni tura ngaih a ni.
Barcelona hi Mimuala semi-final an khelh hnuhnung vawi li ngawtah tlawm zawk an ni zel a. An mualah pawh an hneh zawh loh Inter Milan tum tur an ni bawk nen fiahna hautak zawk an hmachhawn a ngai dawn. Hetihlai hian semi-final thawh khatnaa an chhawr thei loh Robert Lewandoski an chhawr thei tawh mai thei thung a. Season kal meka goal thun thei tak Lewandoski an chhawr thei a nih ngat chuan an hlauhawm phah sawt ngei dawn a, inrintawkna sang zawk an neih phah ngei thung ang.
Inter Milan tan hian rawlthar duhawm Lamine Yamal chu buaipui tham a ni leh ngei dawn. An intum hmasak tumin Yamal hian ennawm ropui a lo lantir tawh a, Inter Milan tlarhnung a chhaihbuai hneh thei hle. Kum 17 mi Yamal hian Mikhual an nihna hmunah fiahna lian zawk a hmachhawn dawn a, puitling taka a ze ngai a chhuah leh thei a nih ngat chuan player danglam bik, thiamna ril pianpui mi a nihzia chiang lehzualin a lantir ang.
Inter Milan leh FC Barcelona te hian inkhel hmuhnawm an lantir ngei dawn a, football ngainatute tan men rei a inchhirawm loh ang.
Inter leh Barca inchinfel zan
Get real time updates directly on you device, subscribe now.
Prev Post