International match 152 a khelh chhungin Remsiami’n eng nge a tih?

November ni 19 khan hockey inelna sang Women’s Asian Champions Trophy final-ah India-in China an hneh a, hemi tuma player of the match chu Lalremsiami Hmar Zote a ni. Tihian Remsiami hian international match 152 a khel ta.
International match 152 a khelh chhung hian Remsiami hi a awm mai mai lo a, inelna sang ber bera a tel lai pawha tih thin, taima taka tih thin a nei.
2016-ah international match a vawi khat nan a khel a, chumi hnuah Olympic Games vawi khat, Asian Games vawi hnih, Asia Cup vawi hnih, Asian Champions Trophy, World Cup vawi hnih, Commonwealth Games leh inelna sang dangah a tel teuh mai. Chu mai a ni lo, khawvel puma hockey-a thuneitu sang FIH-in 2019 chhunga khawvel hmeichhia, kum 23 hnuai lamte zinga hockey thiam berah an thlang.
Chutianga hockey inelna sang ber bera match 152 a khel chhung chuan Remsiami hian Bible vawi riat a chhiar chhuak.
Kum 17 a nih laia a thutlukna chu ‘Bible hi kum tin chhiar chhuah ka tum ang,’ tih a ni a, “Pathian khawngaihna azarah Bible hi kum tin ka la chhiar chhuak thei hlauh,” tiin 2023 thlenga a chhiar chhuah thu a sawi. Kuminah pawh chhiar chhuah leh a tum.
Bible hi a chhiar chhuah thin bakah a duh lai keu kualin a chhiar thin. Bible chhiar taima a ni. A zinnaah pawh a keng zel a, inelna sang an khelh lai pawhin a remchan dan ang angin a chhiar thin.
“Bible hian min tihahdam a, Bible chhiar hi ka hlawkpui, ka nun a tihahdam,” a ti a, “Bible hi ni tin ka chhiar; discipline hi ka ngaisang a, ni tina Bible chhiar thin nih hi ka duh a,” a ti bawk.
Lehkha chhiar ngaina a ni a, Bible bakah lehkhabu dang pawh a chhiar nasa. Inelna sang khela an zin pawhin an cham chhunga a chhiar tur lehkhabu a pai thin. International match vawi 152 a khelh chhunga a lehkhabu chhiar zat erawh a sawi thei lo, a chhinchhiah lo.
Sap tawng lehkhabu a chhiar thin a, a hriatthiam loh pawhin dictionary inchhawpin a chhiar thin. “Ka hriatthiam loh pawhin hriatthiam ka tum a, hma ka sawn phah khawp mai,” a ti. Mizo lehkhabu a chhiar nasa a, Mizorama a haw chang pawhin phaia a awm laia a chhiar tur lehkhabu a lei khawl thin.
“Hmasawn ka duh vangin lehkhabu hi ka chhiar. Thil ka hriat phah a, tin, lehkha chhiar hi nuam ka ti. Mahnia awma lehkhabu chhiar hi nuam ka ti,” a ti.
International match 152 a khelh chhung hian zirna lamah pawh a awm mai mai lo; 2016-a international match a khelh tirhah khan matric pass hlim a ni a, vawi 152 a khelh chuan graduate nula a lo ni tawh. MA zir a la tum bawk.
“Lehkhazir hi keini tan chuan a hautak. Amaherawhchu, kan tum phawt chuan theih loh hi a lo awm lo,” a ti a, “Duh chuan ka zir lo thei a, mahse ka zir a, zir zel ka duh. Tih tur neiha kan tih tur tha taka tih hi a hlu ka ti a, chutianga awm chu ka duh,” tiin, “Lehkha ka zir hi ka lawm a, ni tin nunah ka hlawkpui. Thil ka hriatthiam phah a, inrintawkna min pe,” a ti bawk.
Hockey khawvela sang tak a thlen hnuah pawh Remsiami hian a nu leh pa thu a la awih a, “Nu leh pha thu awih hi kan tih tur a ni a, an thu hi awih ka tum. Nu leh pa thu hi awih pawh ka inti,” a ti.
A pain a boralsan tawh a, chuti chung chuan a pa thu hi awih a la tum; “Ka pa hi khawvelah awm tawh lo mah se a thu hi awih ka tum a, a duh dana awm hi ka la tum. Ka pain tipuitling tura min duh chu tihpuitlin ka la tum a, hrehawm tih chang leh han hnual chang te pawhin, ‘Ka pain chhel taka hmachhawn turin min duh ang,’ tiin theihtawp ka chhuah thin,” a ti.
A inkhelhnaah lehkhazir a pawimawh hran lo chunga lehkha a zir zel chhan pawh a pa thu a awih vang a nih thu a sawi a, “Dik chiah chuan, lehkha ka zir chhan hi ka pa vang a ni. Ka naupan lai atangin ka pa thu awihin lehkha ka zir a, ka inkhelh hnuah pawh zirna ngai pawimawh turin min duh a, ka puitlin hnu hian a thatzia ka hre chauh,” a ti.
Remsiami hi junior team-a a tel laiin senior team-a tel turin an ko a, Belarus chu senior team-a a hmachhawn hmasak ber an ni. Chung lai chuan a la naupan bakah tawng lamah pawh harsatna a tawk nasa a, tunah chuan thil a dang ta.