International match thleng thei turin Cricket Stadium chei mek

Cricket Association of Mizoram (CAM) ta Suaka Cricket Stadium Sihhmui chu international match thleng thei tur khawpin a inbuatsaih mek a, kum khat a ral leh chuan chu hun chu thleng thei mai dinhmunah a ding mek.
Suaka Cricket Stadium-ah hian CAM chuan project pahnih a kalpui a. Anmahnia project hmanga siam, cheng vaibelchhe 31.5 senna tur hmunhma buatsaih niin, hetah hian inkhel entute thutna tur gallery leh mikhual thlenna (4 star) tur, player-te inthlakna tur, eirawngbawlna leh chaw eina tur hall, physiotherapy room, media room, commentator room, referee room, VIP room, office, multipurpose room, indoor game room leh thil dang engemawzat a awm dawn a ni.
Cheng vbch. 18 senna tur a dang ruahman chu BCCI (Board of Control for Cricket in India) project a ni a. Indoor cricket pitch, swimming pool, gym leh thildang engemawzat a awm dawn. Heng project pahnih hi kum 2025 chhungin an zawh hman tur thu CAM hruaitute chuan an sawi.
He project pahnih hi an zawh hunah chuan international match pawh an thleng thei dawn tih CAM hruaitute hian an sawi a. Tunah an ground neih hi hu international standard a ni sa tawh. “Ground bik hi chu international match khelhna tlak a ni. Mahse, player-te inthlakna leh mamawh hrang hrang kan la neih that loh avangin kan la thleng thei lo a, tuna kan project neih pahnih hi kan zawh hunah chuan international match kan thleng thei ang. Ranji Trophy velah pawh home match khelh nan hman theih a ni tawh ang,” CAM president Lalrochuanga chuan a ti.
CAM hi kum 2018-ah BCCI-ah direct-in an lut a, kum 2018 atanga kumin thlengin Mizoram state budget pawn atangin cheng vbch. 231.9 an hailut tawh. a, Mizoram sawrkarah GST cheng vbch. 10.2 an chhung lut tawh. Player-te hnenah cheng vbch. 158 an pe chhuak tawh bawk. Mizoram economy atan an thawh hlawk ve hlea an inhriat thu CAM hruaitute hian sawiin, “Sawrkar hian cricket tan enge kan tih ve theih, tiin min rawn zawt ve turah kan ngai thin. Cricket hi eizawnna a ni mai loa, hausakna a ni, an ti a, hei hi a takin kan tawng chho mek a ni,” an ti.
CAM hruaitute chuan, Suaka Cricket Stadium awmna chu Aizawl atanga a hlat tham avangin mi tam tak tan pan a harsa a, chuvangin Aizawlah cricket khelhna tur hmun an mamawh hle tih an sawi. Aizawlah cricket centre din an duh em em a, hei hi cricket hmasawn zelna atan a pawimawh takzet tih an sawi a ni. Chutih laiin a ram man hi BCCI atangin an dawng thei loa, ram a awm chuan a ruhrel leh hmunhma cheibawl chu BCCI hian a tihsak thei reng tih an sawi.
Mizote tan cricket-ah India tan pawha khelh theihna kawng a ping bik loa, tuna Mizo zinga crikcet khelte pawh state chhung leh state tana an khelh duhtawk mai loa, a aia sang thlen tuma beih tumna rilru put chu an mamawh nia an hriat thu an sawi a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More