Kudam 71-ah dan loa tawlh kuhva dahthat bag sang 9+ hmuchhuak

Vairengte chhehvela kudam, foreign kuhva dahna nia rinhlelh chu tunhnaiah enfiah a ni a, kudam 71-ah kuhva bag 9635 awma chhinchhiah a ni. Heng kuhva hi khawih che lo tura hriattir an ni.
Mizoram Home department atanga thudawn danin, heng kuhva neitu nia hriatte hi zawnchhuah mek an ni a, report kimchang sawrkarah thehluh a, kalpui zel dan tur thutlukna siam thuai tura dah a ni.
Mizorama kuhva chingtu pawl hrang hrang ngenna bawhzuiin, sawrkar chuan kar kalta chhung khan Myanmar kuhva dap beihpui a thlak a. Koalsib district chhunga foreign kuhva awmna nia rinhlelhte magistrate-ten police hruaiin an dap a; kuhva chingtu society hruaituten an tawiawm bawk.
Vairengte chhehvelah kudam 66, Buhchangphai chhehvelah kudam 5 enfiahin, kudam 20 chhungah foreign kuhva bag 9635 a awm nia chhinchhiah a ni a, kudam dang 51 erawh a ruak mek.
Home department hotute sawi danin, foreign kuhva lo lut tur hi Champhai district lamah pawh khauh zawka ven hna thawh zui a ni a. Police check gate helna ata atana kawngruk sial atangin kuhva trip thum, bag 190 chu tunhnaiah Champhai Police-in an man a, heng kawngruk hi chhun zan zawma ven zui a ni.
Hmun hrang hrangah foreign kuhva veivak vengin police leh kuhva chingtute chhunzan zawmin an duty a. Kuhva chingtu society lam hruaitute hnen atanga thudawn danin, foreign kuhva lo lut avanga harsatna hian a vawrtawp a thlen tawh vangin, foreign kuhva tawlh lui lo turin mitin an ngen a, tawlh lui man palh an awm a nih pawhin man a, a hmuna chinfel zel an tum tawh tih an sawi a ni.