INTERNATIONAL MUSEUM DAY 2023

By: P.C ZOSANGPUII
Curator, Mizoram State Museum
International Council of Museums ICOM chuan kumin International Museum Day (18th May) thupui atan : ‘Museums, Sustainability and Well-being’ a rawn hmang a, keini Mizoram State Museum, Art & Culture Dept. te pawhin hemi ni hian nilengin mipui tan a thlawnin Museum kan hawng leh dawn a, a duh apiang tan a en theih dawn a ni.
A thupuiin a sawi ang khian kumin hian ICOM lam chuan Museum pawimawhna piah lamah thangthar lo la awm zel turte tana chenna tlak khawvel a rawn ngaihpawimawh bakah ‘global climate change’ te leh kan rilru leh taksa hriselnate a dah pawimawh thara kum upa leh naupangte tan keini thalai rual ten he kan chenna khawvel hi i humhalh sauh sauh ang u tih an rawn au chhuahpui tel bawk.
May ni 18 , 2023 hian International Museum Day lawmna programme Pragati Maidan, New Delhi-ah Prime Minister Pu Narendra Modi-a’n a hmanpui dawn bawk a; hemi rual hian International Museum EXPO 2023 hman nghal a ni bawk ang. Mizoram State Museum pawh min rawn sawm angin Stall/booth te siamin International Museum EXPO 2023 kan zuk tel ve thei e.
Mizoram State Museum hi Multipurpose Museum a ni a. Tunah hian Gallery 6 – Zoology, History, Anthropology, Ethnology, Textile , Archaeology kan nei mek. Object display lai mek hi 930 niin Reserve Collection-ah 3017 kan nei mek bawk.
Kan Hnam Nun pholanna hmun a nih avangin Mizoram pawn leh India ram pawn thlengin tlawhtu mi thahnemtak a kum telin an pung ve zel a, hmun laili lai taka awm a nih avangin khualzin hip hnem ber pawl kan ni awm e. Nikum April, 2022 atanga April, 2023 inkar hian Mizoram pawn atangin Visitors 327 kan nei a; tin, India ram pawn (foreign) atangin Visitors 25 kan nei bawk a ni. International Museum Day bakah kum tin Museum Week kan hmang bawk thin a, ni khata entu 3000 chuang neih chang te pawh kan nei hial thin. Research scholar-te leh sikul naupang leh college zirlai tamtak tan zirlai puitu pawimawh tak he kan Museum hi a la ni reng a. Tun hmain mi thenkhatin Museum chu thil hlui leh thil mak dahkhawmna angah te an ngai thin a, mahse kum engemawti atang khan thangthar tamtakin Museum pawimawhna rawn hre chho thar zelin Mizo culture, custom & tradition hriat theihna hmunpui ber a lo ni ta.
‘The past is kept alive for the future’ an lo tih angin Museum hi Non-Formal Education centre pawimawh tak pakhat a ni.