Social media atangin lung inah

Tun hnaiah, social media lama dik lo taka mi chhaih nawmnahtu mi pahnih chu court-in lung ina tang tur leh sum chawi turin a hrem a.
Heng mi pahnihte hian court chu an lakah zahngaihna lantir tur leh a na lo thei ang bera an chunga hremna lek tura an ngen avangin, kum khat chhung lung ina tang tur leh Rs. 10,000 ve ve chawi turin court chuan a hrem a; sumfai hi an chawi loh chuan, thla nga dang an tan belh dawn a ni.
Social media atchilhna hian thil pawi a thlen nasa ta hle. Social media atchilhna avanga hun khawhral zozai hi a uiawm hle. Thufingin ‘time is money’ a lo ti a; social media atchilh avanga hun khawhral hi belhkhawmin sumah chantir ni ta se, Aizawl khawpuiah ringawt pawh hian, tuihawkin kawmkar atanga bawlhhlawh a khawrh chhuah thin, kawngsira a chhek vum thur ang mai hian hmun tinah a vum ther thur theiin a rinawm.
Social media-ah hian duh duh pholan emaw, sawi emaw hi thiang ta anga ngaihna hi a awm nge ni, tawngkam tuitang lo, dengkhawng tak tak, midang rilru natna leh thinrimna tur emaw, mi nuihzabura tute emaw siam tumna ang hrima status leh comment hmuh tur a tam thin hle. Chutiang chu midangin an lo nuih dur dur a, inbawl kualna nen, thupui fun lo, thu holam tak tak buaipui hian hun hlu tak hi kan khawhral huau huau reng mai a ni ber awm e.
Kan va tih luatah lenga te, lengi ten kan zir sual mek a, ‘lung ina tan leh pawisa chawi’ mai piah lamah, kan la intuk thlu rem rum lovang tih sawi theih a ni ta lo.
Assembly session live chat te phei chu, khawi lai kawmkara a ruka ruihtheih thil ti thin ten sum kar nei hauh lova tawngkam zahmawh pui pui an phuhchhuahna ang lekah kan chan zo ta a tih theih hial awm e.
Sawrkara thuneitute hian he lama mipui zirtirna hi nei thar lehin, pawl hrang hrang leh kohhran thleng pawhin, kan tan tlan a ngai ta a ni ber e.