India-a internet hmangtu chu kumin chhungin maktaduai 900 an tlin rin a ni a, hei hi digital content-ah India tawng a tel tam tawh vang ni thei pakhatah ngaih a nih thu IAMAI leh KANTAR chuan a tar lang.
‘Internet in India Report 2024’ chuan kum 2024-a India-a internet hmangtu hi maktaduai 886 niin a tar lang a, kuminah hian 8% vela a pun rin a ni.
“India-a internet hmangtu hi kum 2025-ah hian maktaduai 900 a tlin rin a ni a, hei hi India mite hriat thiam tawng a tel tam tak vang a ni pakhat ang,” tiin report-ah hian tar lan a ni.
Thingtlang lamah internet hmangtu maktaduai 488 an tling tawh a, hei hi a tipungtu ber a ni a, internet hmang zingah thingtlang mi hi 55% an tling tawh.
Indian hriat thiam tawng hian internet hmanah kawngro a su thui hle niin report chuan a ziak a. A hmangtu zawng zawng deuhthaw (98%) chuan anmahni tawngin an hmang a. Tamil, Telugu leh Malayalam te phei chu India-a internet-a hman tawng lar ber pakhat a ni tawh.
Khawpuia internet hmangtu zahve aia tam (57%) pawhin anmahni tawng thovin an hmang a, hei hian tual chhung tawng ngeia hman theihin nghawng a neihzia a tilanga ngaih a ni.
Report-ah hian internet hmangtute kum inthlauhna pawh a zim hret hret tih a tar lang a. Hmangtu 47% chu hmeichhia an ni bawk tih tar lan a ni.
Internet hman theihna leh a chak zawng pawh a pung chak hle a, a bikin khawpuiah hei hi a nasa zual a. Hetih mek lai hian thingtlang lamah pawh a hmangtu punna hi khawpuia hmangtu punna zat let a tling a ni.
Khawpuiah chuan tun hma lama internet hman ngai lohna – smart TV leh smart speaker hman a pung a, hei hian internet hman a tipung nasa hle a. Kum 2023 aia 2024-a hetiang hmanraw hmang punna chu 54% daih a ni.
Hetih lai hian khawpui leh thingtlangah pawh internet hmanna pui ber chu mobile phone a la ni reng.
India thingtlang lama hmanna tam ber chu OTT video en leh rimawi ngaihthlak, online-a inbiak leh social media a ni a. Khawpuia hmangtute hmanna nen a inang lo hle a, khawpuia hmangte hmanna tam ber chu sumdawnna, sum pek chhuahna, lehkha zirna leh inbiakna atan a ni.
Internet hmangtu maktaduai 900 kai ring
Get real time updates directly on you device, subscribe now.