Inthlan a hnaih lohnaah kawngpui siam ngaihthah – K Hrahmo, MLA

Inthlan a hnaih lohnaah
kawngpui siam ngaihthah
– K Hrahmo, MLA
ZPM sawrkar chu inthlan a hnaihna hmun Aizawlah mipui sum hmanga kawngpui siam a ngaihpawimawh laiin, mipui sum an hmuhna tho inthlan hnaih lohna hmunah chuan kawngpui a ngaihthah leh thung si niin Palak bialtu MLA K Hrahmo chuan a sawi.
Zirtawpnia BJP Mizoram office-a inkhawmah BJP State Core Group member ni bawk K Hrahmo hian, mipuiin petrol leh diesel man kan pek sum tlingkhawm atangin Aizawl khawpui kawng siam a nih lai hian, Siaha district-in oil atanga tax an pek cheng vaibelchhe 8.7 chuang ni mah se, inthlan a hnaih loh vang nge an kawngpui chu a chhiat ngaiin a chhe reng tih a sawi. Hetiang hi thil thleng mek a nih avangin AMC inthlan turah ZPM party-in hamthatna a beisei vang a nih a rinawm, tiin, “Mipui sum hi party mala lo intihtheihpuina chi a ni lo,” a ti.
Congress party hna ber chu BJP sawichhiat a ni a, development policy an nei lo tih BJP MLA hian a sawi. NLUP pawh kha central-a Congress lal laia an lo pass tawh, BJP sawrkarin a cancel sak loh mai mai a ni, tiin, “NLUP thami eng ang pawhin zuar leh pawh nise, central-a BJP kaihhruai sawrkar hian chatuanin a pe dawn tawh lo. Chuvangin, Mizorama Congress party tan chuan beisei tur a bo hle a, mipui pawh NLUP tha mi lakah fimkhur turin ka ngen a ni. Tun hun hi BJP hun a ni mek a, BJP chuan development hi kan thupui ber a ni,” a ti.