‘Tax terrorism’ kalpuia puh an nih hnuah Income Tax department chuan April 1 khan Supreme Court hnenah Lok Sabha inthlan awm mai tur hisapin Indian National Congress te hnena Rs 3,500 crore tax pe tura an tih chu an phutluih rihloh tur thu a hrilh.
Justice B.V. Nagarathna bench hnenah Solicitor General Tushar Mehta chuan ‘inthlan kalpui mek a ni a, political party tumah harsatna siamsak kan duh lo. July 24, 2024 a case ngaihtuah a nih leh hma chuan engmah phutluiha chetlak kan tum lo’ tiin a hrilh a.
“Sawi tur hre lovin min siam hial mai” tiin Congress aiawha ding senior advocate A.M. Singhvi chuan beiseiloh lutuka thil thleng chungchang chu a sawi a ni.
Income Tax department tena Congress te chu notuice thar pe a kum 2014-15 atanga 2016-17 a tax an pek loh Rs 1,745 crore a ni tiin an thing leh a. Income Tax department tena an notice thar ber leh a hmaa mite nen Congress tena chhiah an pek tura an tih chu Rs 3,567 crore lawih a tling a. Tuna tax notice thar an sawi hi chu kum 2014-15 (Rs 663 crore), 2015-16 (Rs 664 crore vel) leh 2016-17 (Rs 417 crore vel) a ni a. Sorkar thuneitute chuan political party te hnena chhiahawl kalpui chu Delhi High Court in March 2016 a order a tihchhuah behchhana kalpui an ti bawk.
Congress chuan High Court order siama gross receipt tax lek theih a tih chu a khing a. “gross receipt hi taxable a ni ngai lo. Total income chauh taxable a ni. Political party kan ni a, profit-making organisation kan ni lo” tiin Singhvi chuan a hnial a. Section 13A of the Income Tax Act chuan political party te tax exemption a pe a ti bawk.
Mehta chuan Rs 3,500 crore chuang chu tun hnai kum sarih chhunga ‘block assessment’ a ni a ti a, attachment hmang party chhuhsak Rs 135 crore a huam tel lo a ti bawk.
Mehta chuan department lam chuan inthlanpui hmachhawn dawn mek lai hrerengin inhriatthiamna kalpui a duh zawk a ni a ti a. March 2024 a Rs 3,500 crore tax pe tura tih chu Supreme Court a appeal awm mek nen inlaichinna a nei tlem hle chungin hriatthiamna kalpui ni se a ti ta tho a ni a ti bawk.
Inthlan hmain INC te nawrlui rih dawn lo
Get real time updates directly on you device, subscribe now.
Prev Post
Next Post