Inthlan result-in mipui rilrua ZPM hniam chak zia a tilang

Village council leh local council inthlan result atangin mipui rilrua ZPM party tlakhniam chak zia a lang tih MNF chuan an sawi.
MNF Gen. Hqrs. thuchhuak chuan, ZPM sawrkarna hnuaia hnawhsarum taka village council leh local council inthlanpui buatsaih chu a zo ta a. Thlantlin zawng zawngte MNF chuan a lawmpui a, tling zo ta lo te a tawrhpui tih a sawi.
Party tana nghet taka ding MNF candidate-te a chhuangin, an thawhrimna leh inpekna fakawm a ti a. MNF candidate-te tana rim taka thawka beitu party mipui leh an party candidate-te vote puitu zawng zawng chungah MNF chuan lawmthu a sawi tih a sawi bawk.
‘Sawrkar thar phur vanglai leh an kalthui hmaa inthlan hmachhawn kan ni a. Tum dang LC/VC inthlan tawha ruling party-ten chakna an chan thin dan nena khaikhinin, tun dinhmuna MNF-in chakna kan chan dan thlirin a lawmawm kan ti a. He inthlan result hian ZPM party chu mipui rilruah tlakhniam lam nasa takin an pan zel tih a tarlang chiang hle,’ a ti.
Kalphung thar sawrkar an zawrh ang ngeiin, mipui tan thlei bik awm loa hna thawk thei turin VC/LC thlan tharte thuam chak a, thuneihna semzai kawnga mipui sawrkar din an tum chu thlan tharte hmang hian a takin hmang nghal se an duh tih a sawi a ni.
‘Mipui duhthlanna hmanga thlantlin tak zawng zawngte, kan ram, kan hnam leh kan sakhaw himna tur leh kan khawtlang theuhin hmasawnna rahbi an rahna tura thawktu ni zel turin MNF chuan duhsakna kan hlan a ni,’ thuchhuah chuan a ti.