Intihcher nan inchhung sekrek khawih

Intihcher nan inchhung sekrek khawih
Inchhung sekrek khawih i peih lo viau em? Mahse, intih cher duh te tan gym-a kal leh exercise lak nen a that dan a inang thaw thang niin mithiam ten an sawi tlat mai. Khai le, inchhung sekrek khawih thatna ni a Times Of India health section-a an tarlan te kan rawn chhawp chhuak ve e.
1. Insuk hi weight paihna tha tak a ni. Darkar chanve i insuk chuan calorie 200 vel i paih hman anga chhut a ni a, insuk zawhah bathroom chhuat leh bang vel te i hru fai leh nghal a nih phei chuan calorie i paih belh zel dawn tihna a la ni zui.
2. Chhuat nawh te hi i ning viau em? Darkar khat vel chhuat i nawh chuan 180 calorie vel i paih tihna a ni a. Hmun i phiat zui nghal a nih phei chuan calorie i la paih belh leh zel.
3. Chaw eikhamah thu nghal hnur ringawt lovin thleng han sil teh. Darkar khat thleng sil hian 125 calorie kan paih daih niin an chhut a nia!
4. Tukverh darthlalang leh dressing table darthlalang te, center table darthlalang te kha han nawt fai teh, minute 30 chhungin 125 calorie i paih hman der dawn a nia.
5. Zing thawh hlima khum han siam te pawh hi peihawm loh viau mah se darkar khat khum siam hian 130 calorie kan paih daih!
6. Nau bual hi a nuam a, a hlimawm bawk, chutih rualin darkar khat naute kan bual hian 240 calorie kan paih tihna a ni.