Intihcher tumte tan dhania tui in a tha

Intihcher tum chuan exercise lak mai bakah ei leh in a pawimawh a, kan ei leh in a dik loh chuan exercise lak nasat viau pawhin duh angin result tha kan hmu thei thin lo. Ei loh tur leh ei tur kan hriat a ngai a, ei loh tur zingah chuan heng processed food (processed food chu issue hmasa lamah kan sawifiah tawh kha) te hi a langsar an ni a, chutihrualin metabolism tichak thei ei leh in tur pawh kan hriat a pawimawh. Metabolism a chak chuan thau kan paih chak bik thin a ni. Tun tumah hian intihcher tumte tana dhania (coriander) tui a that theih dan Times of India health section-in an tarlan te kan rawn chhuah chhawng e.
Dhania hian medicinal properties a neih avangin damdawi atan thatna chi hrang hrang a nei a, a hnahah hian quercetin pigment a awm a, chu chu antioxidant leh anti-inflammatory effect nei a ni. Zirchianna hrang hrang an lo neih tawh atanga a landanin dhania hian digestion a pui thei a, thil ei tuina te pawh a siam thei niin an sawi. Digestive system a hrisel thata, hna an thawh that hi intihcher tumte tana pawimawh tak mai a ni a, a chhan chu digestive system a hrisel loh a hna a thawh that loh chuan metabolism a chak lo thin a, thau te a awl duh bik a ni.
Dhania tui chu engtin nge i siam ang a, engtin nge i in ang? Tihdan awlsam deuh pahnih a awm-
1. Dhania hnah 20 vel tui no khatah chiah la, zankhuain chiah la, a tuk zingah, thildang engmah i ei hmain a tui chu i in dawn nia. Chumi hnu minute 15 velah exercise la la, chu chuan metabolism a tichak lehzual dawn a ni.
2. Dhania hnah chu silfaiin rawt sawm la, tui lum leih lut a, a tui chu sawr chhuak leh la, chu chu zingkarah thildang ei hmain, kawruah laiin i in dawn nia. Hei hian metabolism a tichak thei.
Hetihrual hian naupai lai i ni emaw, naupai i tum mek emaw a nih chuan nitin dhania tui in hi i tan a tha ber lo mai thei a, doctor i rawn dawn nia.