Intihcher tumte tana exercise tha

I rihna paih tumin thla eng emaw zat exercise i la tawh a, mahse, i beisei ang result i nei thei lo a nih chuan i exercise lak kha calotie burn chak duh chi a ni lo a ni mai thei. Exercise chi hrang hrangah hian calorie burn chak duh bik riau a awm niin mithiam ten an sawi tlat. Gym-ah rit chawi leh treadmill a tlan te khan i beisei ang result a pe lo che a nih chuan i exercise lak dan i thlak a tha ang. Tun tumah hian Times of India health section-in rihna tihhniam tumte tana exercise tha, calorie burn chak duh chi ni a an sawi te kan rawn tarlang e.
1. Infiammi zawng zawng deuhthaw hi an inhruai zuan lai hmuh tur a awm deuh zel mai a, hei hian chhan tha tak a nei. Inhruizuan hi footwork training nan a tha a, heart rate a siamtha bawk. Chu chu calorie paih chak chi tak mai a ni a, reilote chhunga calorie paih teuh theihna a ni. Darkar khat inhruaizuan hian calorie 1,074 vel burn hman anga chhut a ni. Tin, inhruizuan chu a awlsam a, khawiah pawh tih mai theih a ni.
2. Tuihleuh hi intihhlimna anga ngaih ngawt chi a ni lo, taksa sawizawina tha berte zinga mi a ni. Calorie burn tam i duh chuan nitin tuihleuh tum teh. Mi kg 90 vela rit hi darkar khat vel tih tak takin tui hleuh seka calorie 892 vel burn hman angin an chhut. Tuihleuh hian tihrawl a tichak a, flexibility a siam tha a, taksa hriselna atan a tha hle a ni.
3. Step a tlan hi calorie burn tam duh chuan tih chi tak a ni. Kg 90 vela rit hi step-ah darkar khat vel tlan se la, calorie 819 vel burn hman anga chhut a ni. Step-a tlan hian tihrawl a siam tha a, lunglam (cardiovascular) hriselna atan pawh a tha hle a ni.
4. Rit chawi leh treadmill a tlan vel i ning ta deuh a nih chuan tennis emaw badminton emaw khelh zir teh. Heng game pahnih te hi a game a rang a, rang tak taka tlan kual deuh sek ngai a nih vangin calorie a burn chak lehzual. Tennis darkar khat khelh hian calorie 728 vel burn hman anga chhut a ni.
5. Basketball pawh hi calorie burn chakna game a ni. He sport-ah hian rang tak taka chet kual zung zung a ngai thin a, chu chu thau paihna tha tak a ni. Darkar khat basketball khelh hian calorie 728 vel burn anga chhut a ni.
6. Aerobics regular taka tih hi intihcher nan a that bakah tihrawl siam mawi nan a tha hle. Aerobic movement hian kan taksa tihrawl chetdan awmze nei takin a control a, darkar khat vel nasa lutuk lo va aerobic tih hian calorie 420 vel burn angin an chhut.
7. Taekwondo hi self-defence exercise a ni a, he martial arts exercise-ah hian speed, power, concentration leh thawk dan control a pawimawh a, chuvangin rihna paih duh te tana exercise tha tak a ni. Kg 70 vela rit-in darkar khat vel taekwondo a practise hian calorie 730 vel burn anga chhut a ni.
8. Chak vak lo va tlan deuh euh euh (jogging) hi calorie burn nana exercise tha a ni a, darkar khat vel jogging hian calorie 755 vel burn anga chhut a ni. Jogging-ah hian taksa pum a che a, tihrawl tan a that bakah lung (heart) tan exercise tha tak a ni bawk. Exercise lak dan awlsam, mi ti-fit thei a ni bawk.