IOC gas bottling plant siam thar tum sawipui

IOC gas bottling plant
siam thar tum sawipui
Indian Oil Corporation Ltd. executive director & State head, Assam Oil Division – North East bialtu leh a hote chuan Nilaini khan Food Civil Supplies & Consumer Affairs minister K Lalrinliana an kawm a. Mualkhang Bottling Plant sak len leh sakthat tumna chu tan theih thuai a nih dawn thu leh hemi atana lungphum phum dan leh a hun tur an sawipui a. Lungphum hun tur hi chief minister an kawm hnu ah sawi ho leh an tum.
Mualkhang Bottling Plant hi kum 2006-a hawn niin, Oil Industry Safety Directorate-in safety norms an siamte a phak tawh loh avangin 2020 kumtir khan khar a ni a. A siamthat leh tih lenna turin Mizoram sawrkar chuan kum 2021 khan ram hectare 2-a zau leiin a lo pe tawh a ni. Tuna gas bottling plant siamthar tur hi 30 TMTPA – 30000 metric tonnes per annum, kum khata MT 30000 siam chhuak thei tura duan a ni a, thla 24 chhunga siam zawh tura ruahman a ni.
Tunlai hian Mizorama LPG mamawh zat hi nitin truck 20 vel phur a ni a, chu chu bur 6120 vel a ni. Thlakhatah bur 183600 vel mamawh niin kum khatkhatah bur 2203200 vel mamawh anga chhut a ni.