Iran-in Donald Trump thah an la tum reng ti

Iranian general chuan, an commander chhuan tawlawl Qasem Soleimani an tihhlum avangin US President hlui Donald Trump leh secretary of state hlui Mike Pompeo te chu thah an la tum reng tih a sawi.
Tehran chuan Soleimani, Revolutionary Guard Corps hotu lu ber thattu te lakah phuba lak a lo intiam sa tawh a. Soleimani kha January 2020 khan Baghdad airport ah US drone hmanga tihhlum a ni.
“Trump, Poempeo leh McKenzie (US general hlui) te kan tihhlum theih kan beisei a, anni hi commander Soleimani thahna thupek petute an ni” tiin Iran General Amirali Hajizadeh, Guards’ aerospace unit commander chuan television kaltlanga thusawina a neihah a sawi a.
Soleimani thahna thupek hi khatih laia US President Trump chuan Iraq-a US dinhmun that nana a tihchhuah niin khatih lai khan Iran chu Iraq a buaina siamah puh an ni.
Soleimani thah a nih tuk lawkah Iran chuan Iraq-a US airbase chu missile-in a kap zui nghal a, khatih lai khan US sipai thahnem tak awmin mahse nunna chan an awm lo va, mahse, sipai thenkhatte erawh hliam na tak tuara tun thlenga pangngai lo zui te pawh an awm niin Washington chuan a sawi thung.
United States leh an thawhpui ram te chuan Iran chu ballistic missile programme kalpui ru rengah leh Middle East a buaina chawk chhuak rengtuah an puh bawk a ni.
Television kaltlanga thusawina a neihah Hajizadeh chua Iran chuan tunah chuan ‘American lawng lian te 2,000 kilometres a awm chin te a kap pha tawh’ tiin a sawi bawk a.
“European te kan zah em avangin 2,000 kilometres chin bak hi pelh kan tum lo va, European te hian kan zahna lantir hi an hrethiam tur a ni,” tiin iranian general chuan a sawi bawk a.
Kar kalta Inrinni khan Iranian state television chuan Paveh cruise missile thar 1,650 kilometres kap pha an tih chu pholanna an nei zui bawk a.
Hei bakah hian official broadcaster chuan Iran chuan Syria hnenah defence lama phuisuina a neih theih an 15-Khordad surface-to-air missile system a pe dawn a ti bawk.
Iran sorkar chuan a chhuanvawr Revolutionary Guard Corps hotu Soleimani tihhlum a ni kha a la na hle a, tun tlengin a phuba an lek ngei tur thu Iranian official lawk tak tak te chuan an la sawi zui reng a ni.