Iran-in Sweden-ah ambassador tir duh lo

Iran chuan Stockholm khawpuia mosque pawna Koran hal a nih avangin Sweden-ah ambassador a dah rih dawn loh thu Iranian Foreign Minister Hossein Amirabdollahian chuan a sawi.
Kar kalta Nilaini khan mi pakhatin Stockholm central mosque pawnah Koran pawtthlerin a hal zui a, khami ni kha Muslim te Eis al Adha holiday nikhatna a ni chiah bawk.
Swedish police te chuan Koran haltu chu manin thubuai an siamsak zui nghal a. Mahse, a hnuah newspaper interview a neihnaah Koran haltu chuan Iraqi refugee Sweden a inhumhimna ngen mek a nih thu a sawi a ni.
Ninganiah Iran Foreign Ministry chuan Sweden ambassador chu ko nghalin Koran chu Islamic thil serh zah ber a nih thu sawiin inhmuhsitna anga an ngaih thu an hrilh nghal a.
“Sweden-a ambassador thar dah tura ruahmanna siam mek a nih laiin Swedish sorkarin Holy Koran hal a nih theih nana phalna a pek kan duh loh avangin hmalak zui a ni lovang,” tiin Amirabdollahian chuan a sawi a. Eng tianga rei nge Sweden-ah ambassador an dah dawn loh erawh a sawi lo thung.
Sweden police-te chuan tun hnaiah anti-Koran demonstration awm tur te an hnawl vek chungin court chuan police te thutlukna chu hnawlsakin freedom of speech rahbeh tumna a ti thung a ni.