Ireland sawp chunga home leg zo India

India mipa hockey team-in home-a FIH Pro League campaign an kalpui chu Pathianni khan an zo fel a, tawp kharna inkhelah sili faiin an aia ranking-a hniam zawk Ireland an sawp.
Indian team hian khelh riat atanga point 15 hmuin FIH Pro League table-ah pathumna an luah.
Rourkela khaw inkhelah Indian men’s hockey team tan Nilakanta Sharma (14th minute), Akashdeep Singh (15th), Gurjant Singh (38th) leh Jugraj Singh (60th)-te’n goal khungin, Nilakanta leh Jugraj-te goal hi penalty corner atanga lut a nih laiin Akashdeep leh Gurjant-te’n field goal an vawlut thung.
India hian inkhel thunun zawk chungin half time-ah sihnih faiin hma an hruai hman a, Ireland lakah chuan an la u deuh.
Indian team hi game riat khelhah vawinga chakin, chu’ng zinga pahnih chu khelh pangngaia an chak leh tum hnih dang chu shootout-a an tlawmna a ni.
Vawithum an tlawmnaa vawikhat chu hun pangngaia an lawmna niin, vawihnih chu shootout hmanga chak loh a ni ve thung.
Hmahruaitu Netherlands chuan point 26 nei tawhin, pahnihna Australia-in point 20 an khawl tling tawh a, pathumna India tan hmabak a ko viau tawh a ni.
Harmanpreet Singh-a hoin India hian home leg an zo fel a, kumin May leh June thla hian FIH Pro League campaign an chhunzawm leh dawn a, European leg a nih tawh dawn avangin ram pawn lamah India mipa hockey team hian fiahna lian zawk an hmachhawn zui leh dawn a ni.