Israeli sorkar leh Palestinian Authority te chuan tharumthawhna tihtlem a nih theih nan hmalak dun ni se an ti.
Tun hnaia Jordan-a inbiakna an neih US leh Egyptian officials te pawhin an telpui rah nia ngaih a ni a.
Meeting-ah pawl pahnih te chuan inremna tluantling a awm theih nan hmalak dun ni se an ti a. Inbiakna neih lai erawhin West Bank-ah Palestinian silai keng pakhatin Israeli pahnih a kaphlum thung a.
Israeli military-te chuan he silai keng hi an umzui thu sawiin hei vang hian West Bank-a sipai an dah pawh tipungin batallion hnih an dah belh thu an sawi a. Israeli pahnih kahhlum zinga pakhat hi sipai a nih thu an sawi bawk.
Israeli sorkar chuan Palestinian silai keng chetlak dan hi Palestinian firfiakte chetna tiin a sawi zui bawk.
Israeli pahnih kahhlum an nih hnu hian West Bank-a Israel awm te chuan Palestinian khua luhchilh nghalin thingkung leh car te an hal zui nghal a. Chenna in 15 lai halin car tam tak a kang chhe bawk niin Palestinian te chuan an sawi.
Palestinian Red Crescent emergency services te chuan mi za chuangin hliam an tuar tiin an sawi a. West Bank-a Za’tara-ah Israeli settler tena silai an hmehpuahnaah Palestinian mi pakhatin nunna a chan niin Palestinian health officials te chuan an sawi bawk.
Tun hnaia Israel leh Palestinian te inkara tharumthawhna hluar thar avang hian Red Sea resort Aqaba ah inbiakna neih a ni a. Kum tam tak hnuah Israeli leh Palestinian security chiefs te chu dawhkan khat kilin an thukhawm a. US president top Middle East adviser, Brett McGurk pawh a tel ve a ni.
“Palestinian leh Israeli te chuan a hmaa inremna siam tawh te tihhlawhtling tur leh inremna tluantling a awm theih nan theihtawp chhuahin hma an la ang,” tiin inbiakna neih zawh hnua official-a thuchhuah chuan a tarlang a. “Buaina a punlun loh nana hmalak leh tharum thawhna a thlen zui loh nan hma an la ang,” tiin ziah lan a ni bawk.
Inremna siam chuan Israel pawhin thla li chhung settlement building thar sak loh a remti a ti bawk a. Chumi denchhen chuan Palestinians te pawhin UN-ah Israel laka hremna lekkawh a nih theih nan a zualko lovang tih a ni bawk. Inbiaknaa tel pangate chuan thla tharah Sharm el-Sheikh, Egypt-ah inbiakna neih leh ni se an ti bawk.
US National Security Adviser Jake Sullivan chuan ram pahnih tena inremna an siam thei chu lawmawm a tih thu sawiin ‘Israelis leh Palestinians tena inremna ngelnghet an neih theih nan’ hna tam tak thawh tur a la awm a ti thung.
Mahse Israeli Finance Minister Bezalel Smotrich, Benjamin Netanyahu sorkar a far-right group member chuan ‘Settlement ah construction kalpui te tihtawp a ni lovang a, nikhat pawh chawlh a ni lovang’ tia sawi thungin Israel Defence Forces (IDF) te chuan tiamchin awm lovin firfiak te beihna chu an kalpui zel ang a ti thung.
Palestinian militant group Hamas te Gaza Strip thununtute chuan Palestinian Authority (PA) te chu Israel nena inbiakna awmze nei lova an tel avangin an dem thu an sawi thung a.
Hetih lai hian inbiakna neih mek laia Hawara-a Israeli pahnih tena beih an tawk chu PA tena lone wolf attacker te laka thuneihna an neih lohzia lanna tura sawi a ni bawk. Tun thlengin tute mahin Israeli mi leh sa te beiha mawhphurhna la an la awm lo bawk a.
Netanyahu chuan a sorkar chuan firfiak te danga Israel security humhim turin thil tul pawimawh tin a ti ang a ti bawk.
-- Advertisement --
Mi 70 chuangin nunna chan tawh
Kumin kumtir atangin Israel forces te kutah Palestinian militant leh civilian 6- chuangin nunna an chan tawh a. Israeli lamah mi 13-in nunna an chan tawh bawk a, heng zinga paramilitary police officer pakhat tihloh chu civilian vek an ni.
Tun hnaia tharumthawhna hluarah Isralei military te chuan Nablus Old City a Jenin refugee camp tum hnih dap thuin hetah hian Palestinian 10 leh 11 te tihhlumin an awm a, kum 2005 hnua Israeli sipai te operation kalpuia nunna chan tam ber a ni.
IDF te chuan Israeli civilian leh sipai te beih tum Palestinian te man tum an nih thu an sawi ve ve a, Palestinian militant leh civlian te nunna cha an awm thu an nemnghet bawk.
Thla kalta khan Palestinian pakhat chuan East Jerusalem a synagogue bei thutin Israeli paruk leh Ukrainian khua leh tui pakhat in nunna an chan a, kum 2008 hnua Israel a firfiak chetnaa nunna chan tam ber a ni bawk.
Thla thar lawk hi Islamic holy month Ramadan a ni dawn a, Jewsish Passover holiday ni dawn bawk nen boruak tang taka a awm mek laiin inbiakna neih a ni thei zawk hlauh a ni.