Israel-a chema inbeihnaah putar thi

Israel-a chema inbeihnaah putar thi
Israel hmar lama Haifa khawpuia chema mi beihna thlengah putar a thi a, mi dang paliin hliam an tuar bawk a. Police chuan a titu hi mi firfiak niin an sawi.
Mi beihna hi HaMifratz Central train leh bus station-a thleng niin a titu hi a hmunah venhim hna thawktuten an kap hlum ve nghal niin police-in an sawi.
Thi hi kum 70 mi vel niin Magen David Adom ambulance service chuan a sawi a. Mipa naupang kum 15 mi leh mipa leh hmeichhia, kum 30 bawr vel chu an dinhmun a tha vak lo va, pitar kum 70 pawhin hliam a tuar a, a ngaihtuahawm lo thung niin an sawi.
Police chuan a titu hi Israeli Druze mipa niin Shfaram khuaa mi a ni a, tun hnai lawka ram dang atanga haw niin an sawi a. Hetianga Israel-a Druze hnamin mi a beih hi a thleng ngai lo hle niin an sawi bawk.
Druze hi hnam bil leh sakhaw bil nei an ni a, an rinna hi Shia Islam hrul a ni a. Israel-ah hian mi 1,50,000 chuang awmin Golan Heights velah an awm bawk a, Israel-a cheng mihring 1.5% vel an ni.
Thil thleng hmutu pakhat chuan a titu hi bus-in Haifa atanga khawchhak lam km 10 vela hla, Shfaram atangin Haifa-a thleng niin Israel-a Walla news website a hrilh.
Bus-in station a thlen veleh a chuanpui passenger-te chu a bei zui nghal a, a chhuk hnuah a bul hnaia mite a khawih zui nghal niin a sawi.
Prime Minister Benjamin Netanyahu chuan, “Ka nupui, Sara-i nen Haifa-a mi beihna thlenga thi ta chhungte kan tawrhpui tak zet a. Min thah tumtute chu khawi hmunah pawh kan bei zel ang a, kan hneh ang,” a ti.
Eng pawl mahin an tihah an la chhal lo va, hetih lai hian Hamas chuan pawikhawihtu chet dan chu chhuanawm an tih thu leh Israeli-ten Palestinian-te chunga an chet dan avanga khuarelin phuba a laksakna niin an sawi.
Haifa-a thil thleng hi Gaza-a inkahhai chawlhkar ruk awh an hman zawh hnua Hamas leh Israel inkara kalpui zui zel dan tura inpuh tawnna a thlen mek laia thleng a ni.
Israel chuan Hamas-in US rawt anga inkahhai thawh khatna, Inrinni zana tawp ta pawh sei a pawm loh hnuah Gaza-a puihna thil lut thin chu a dang vek.
Hamas hian Israel chu inremna bawhchhiaah puhin thawh hnihna atan chuan inbiak zui zel an inpeih reng tih an sawi.