Japan-in kum 30 chhunga ram kang nasa ber tuar mek

Japan-in kum 30 chhunga ram kang nasa ber tuar mek
Japan chuan kum 30 chhunga ramngaw kang nasa ber tawng mekin a thelh hna thawk turin mi 2,000 chuang an tir chhuak.
Ningani atanga hmar lama Ofunato khawpuia ram kangah hian mi pakhat thi tawhin acre 5,200 chuanga zau a kang tawh niin Fire & Disaster Management Agency (FDMA) chuan a sawi.
January leh March inkar hi Ofunato-a a ro ber hun lai niin kumin hi kum 20 chuang kal tawh atanga chhut letin February-a ruah an dawn tlem ber tum niin millimetre 2-5 chauh an dawng a, kum dangah chuan chawhrualin millimetre 41 an dawng thin.
Ram kang hian a la tuam zau zel avangin sorkarin inthiar chhuak tura a tih mi 4,600 chuang an la awm.
Mi 2,000 vel chu inthiar chhuak awm tawhin an thian leh lainate an fin mek a, mi 1,200 chuang chu khawsakna tur hmun siamsakah an awm bawk tih thuneituten an sawi.
Ram kang hi Iwate Prefecture-a ramngawa kang niin Japan-a prefecture lian ber pahnihna a ni a, mihreng cheng bit lamah erawh a bit loh ber pahnihna a ni.
In 80 chuang a kang chhe tawh a, hetih lai hian FDMA chuan chhiatna thlen dan hi an zir chiangin an en fel mek zel tih an sawi.
“Ram kang hi a zau zel lo vang tih sawi theih a ni lo va, mihring chenna a nghawng lohna turin a tih theih ang zawng zawng kan ti a ni,” tiin Prime Minister Shigeru Ishiba chuan parliament-ah a sawi.
Tokyo telin prefecture 14 atangin kang thelhtu chah khawmin kang hi an thelh mek a. Helicopter pawh 16 vel hmangin thlalakah chuan thlawhnaten tlangram awihtlanah tui an phuh nasa hle tih a lang.
Ram dang tam takte ang bawkin chhinchhiah chinah kum 2024 kha Japan-a a lum ber kum a ni.
Sik leh sa inthlak nasain ram kang hi a siam a ni em tih leh a tinasa zual em tih chu hriat theih a la ni chiah lo va; mahse, ram hman dan chu a chhan lian ber pakhat a ni tih chu a chiang.
IPCC chuan sik leh sa inthlak nasa chuan khaw awm dan a tihdanglam nasat avangin ramngaw kang pawh a awm awlsam sawt niin a sawi thung.