Mi tamnaa car-a mi sutnaah pahnih thi

Mi tamnaa car-a mi sutnaah pahnih thi
Germany khawthlang lam, Mannheim khawpuia kea kalte lirtheia sut luihnaah pitar kum 83 leh mipa kum 54 mi an thi.
Hliam tuar na tak mi panga leh hliam tenau tuar mi panga an awm bawk tih chhuituten an sawi.
Thuneitute chuan a titu mipa pakhat, kum 40 mi, German an man nghal a, firfiakte nena inkungkaihna nei niin an hre lo va; mahse, ‘rilru lama buaina nei’ a ni thei tih an sawi.
An mi man hi huan siam niin a silai mu awm lova a inkahna avangin hliam a tuar a, damdawi inah enkawl niin a dinhmun a tha.
He thil hi Thawhtanni chhun dar 12:15 (India-a tlai dar 04:45)-a thleng niin Mannheim police chuan an sawi.
CCTV footage atang chuan hatchback car dum tlan chak takin Planken shopping street-a kea kalte chu khawthlang lam pan zawngin a su a ni tih a lang.
Thlalak darhah chuan police-in Ford car dum an endik laite langin a hma lam chu a chhe nasa hle.
Baden-Württemberg Interior Minister Thomas Strobl chuan a titu hian a lirthei chu ‘ralthuamah a hmang’ niin a sawi a. “Tun hnaia hetianga car hman sualna thleng thin kan hriat tam tak zinga mi a ni,” a ti a. Easter carnival-a thil thleng nen a inkungkaih em tih erawh an la hriat loh thu a sawi bawk.
Mannheim Chief Public Prosecutor Romeo Schluessler chuan police-in tual pahnih thahna leh thah tumna an chhui zui mek tih a sawi.
Chancellor kal chhuak mai tawh tur, Olaf Scholz-a chuan emergency services-te fakin thil thleng hmutute pawh a chhuina kawngah tangkai taka an thil hriat an sawi a beisei thu a sawi.
He thil hi Germany ram hmun hrang hranga Easter lawm laia pawn lama hetiang ang chi thleng avanga venhimnain sawi a hlawh lai taka thleng a ni.
Pathianni khan Mannheim city centre kaltlanga kawng zawh awmin Thawhlehniah pawh thiltih tur lian tak a la awm.
Bazar chu khar nghal a ni a, street carnival pawh neih a ni dawn lo va. Mannheim daia Feudenheim, Neckarau leh Sandhofen-a carnival tur pawh thulh nghal vek a ni.
Germany-ah hian nikum atang tawh khan tharum thawhna a tam hle a, mi tam tak thi leh hliam an awm.
Thla kua kal taah khan Mannheim-ah tho, Thawhtanni thil thlenna atanga hla vak lovah hian Afghan mipain mi tam tak vitin police a lo thi tawh.
August khan Solingen-ah chema mi beihna thlengin mi pariatin hliam an tuar a, pathum an thi a. Syrian pa man niin Islamic State firfiak pawl nen inzawmna nei nia hriat a ni.
December khan mipain a car-in Magdeburg-a Krismas bazar a su a, mi paruk thiin mi 299 an inhliam a. Kum 50 mi Saudi psychiatrist man a ni.
January khan Afghan, Germany-a himna dil mek kum 28 mi chuan Bavaria-a Aschaffenburg khuaah naupang beiin kum hnih mi leh puih tumtu kawnga kal mipa naupang an thi.
February khan Afghan tho, Germany-a awm dil mek kum 24 miin car-in mi a su a, mi tam takin hliam tuarin a hnua nu leh naupang an thi bawk.