Israel dan siam thar vangin buaina a chhuak

uly 11, 2023 (Thawhlehni) khan Israel ram ah chuan mipui ten rorelna dan siam thatna sorkarin kalpui a tum duhlohna khawlai ah neiin an pungkhawm a, he sorkar dodalna hi ‘puakkehna leh dodalna’ tiin an vuah hial a ni. He dan tharin a tum ber chu Israel rama legislature leh executive te kalh zawnga Supreme Court in thuneihna a neih te tihtlem saka Israel parliament (Knesset) ah simple majority vote (seat awm zawng zawng 120 atanga 61 votes ) hmanga Supreme Court chunga thuneih theihna dan thar siam hi a ni.
Dan siam thar pahnihna chuan Supreme Court-in Israel dan bulpui te constitution zulzuia ataka hman a nih leh nihloh endik chungchanga thuneihna a neih te sorkar kuta hlan a ni a. Tin, Supreme Court Judges te ruat chungchang ah sorkarin thuneihna sang tak a nei tawh ang a, hei hian nasa takin judges ruat chungchang ah politicians te thuneihna sang tak a pe dawn a ni.
He bill thar hi Israel rama rorelna kalphung muang lutuk siam that kawng ni ah ngaih a ni a. Israel Prime Minister Benjamin Netanyahu leh a lamtang te chuan “Reforms” tiin an ko hial a, Israel rama Court te, dan siamtu leh sorkar inkar ah intluktlanna siamtu niin an ngai a ni. Amaherawhchu, a duhlotu leh dodaltu te chuan sorkar kal diklo vengtu leh khaptu ber nuaibo a nih chuan Israel ram chu dictator rorelna kalkawng lama inhruai tumna hmanrua a ni tiin an dodal nasa em em a ni.
He dan duhlotu te chuan Thawhlehni khan Ayalon kawngpui te dangin Tel Aviv panna kawngpui pengthuam ah police te dan sen loh mipui an pungkhawm a, Ben Gurion international airport te an dang hial a ni. Thawhlehni chawhma dar 11 thleng kha chuan he dan dodaltu mipui pungkhawm atangin mi 42 lai police ten an man tawh thu an puang a ni.