Israel-Hamas indonain India ram a nghawng

Kum 2022, February thlaa Russia-in Ukraine a run atang khan khawvel ram economy vir vel a danglam nasa hle mai a.
Khawvel ram economy a insiam that chhoh mek laiin October 7, 2023-a Hamas ten Israel an beih thut thungrulh nan Israel-in Hamas te lakah indo a puang ve leh ta a, hei hian nasa takin khawvel ram ei leh bar zawnna kawngah nghawng nei lehin India ram economy tan ngei pawh tawrhna nasa tak a rawn thlen ve leh mek a ni.
Covid-19 in khawvel ram a tihbuai atanga khawvel ram economy a insiam thar leh mek laiin Russia-Ukraine indonain a nghawng tur chiang takin a hriat theih nghal a ni. Electric eng dek chhuaktu lian ber (Russia) leh agriculture thlai dek chhuaktu lian (Ukraine) te an indo avangin eng chhit man a sang a, ei leh in tur supply a tlemin thil man a sang zo ta vek a ni.
Hmasawn tawh ram te leh hmasawn tum ve mek ram te economy thanna chu a tlahniam rawk rawk mai a ni.
International Monetary Fund (IMF) chhut danin khawvel ram economy thanna chu kum 2022-a 3.5% chu kum 2023-ah chuan 3% ah leh kum 2024-ah chuan 2.9% ah tla thla turin a chhut lawk a ni.
Bloomberg Economics-in a report danin he indona hian khawvel economy than dan leh thil man chungchangah kawng thum-in a then theih a ni.
Pakhatna-ah chuan he indona hi Israel, Palestinian Gaza leh West Bank ah te tawp mai se chuan a nghawng hi a zimin tui alh thei man te, thil man sang leh economic than danah te nghawng a nei lo tura ngaih a ni.
Pahnihna-ah chuan Gaza, West Bank, Syria leh Lebanon, leh Asia khawthlang ram zau zawkah buaina hian nghawng a nei nasa em ema hei hian tuialhthei man barrel khat zelah $8 (Rs,665) in a ti sang a, thil man chawh rualin 0.2% in a ti sang bawk a, ram economy thanna 0.3% te in a ti hniam thung a ni.
Pathumnaah chuan he indonaa Israel leh Iran te an inrawlhna leh Asia khawthlang ram te buaina avangin tui alh thei man barrel khat zelah $ 64 (Rs.5,315) in a sang a hei hi $150 (Rs.12,460) lai a kai hman a ni. Thil man sang hian 1.2 thlengin GDP growth hi 1 point-in a tlahniam bawk a ni.
India ram a nghawng dan –
Tuialhthei man – Kum 2022 khan Iran hian ni khatah barrel maktaduaih 3.7 a la chhuak a, Russia leh Iraq dawta India hnena tuialhthei supply hnem ber Saudi Arabia chuan barrel maktaduaih 12.4 a la chhuak bawk a ni. India-in tuialhthei a lakna hnar lian ber ber te hi indona avanga tihbuai an nih chuan India dinhmun tur chu chiang takin a hriat theih nghal a ni.
Ram dang nena indawr tawnna buai-Indona-in a nghawng tha lo em em mai chu India-Middle East-Europe Economic Corridor (IMEEC)-a India sumdawnna kalkawng buai zel hi a ni.
India-in G20 summit a thlen tum khan IMEEC hi din turin US, UAE, EU,France, Italy leh Germany ten MoU an signed a, hetah hian India leh Europe ramte insumdawn tawnna turin UAE, Saudi Arabia, Jordan, Israel leh Greece ram te kal tlang turin kawng sial tum a ni a. IMEEC in a tum ber chu China bungraw deh chhuah phurhna kawng thlak a, China thil siam chhuahte atanga inthiarfihlim a ni ber a ni.