US-in Ukraine hnena thuruk a hrilh thin a titawp

US-in Ukraine hnena thuruk a hrilh thin a titawp
United States chuan Kyiv hnena thuruk (intelligence) a hrilh thinte chu a titawp a, hei hian nasa takin Ukrainian sipaiten Russian sipaite an beihnaah nghawng a nei dawn.
Zirtawpnia US President Donald Trump leh Ukrainian President Volodymyr Zelenskyy te an inbakkaih hnuah US hian sipai lama Kyiv a puihna a titawp rih ta vek a ni.
Kum 2022-a indo a chhuah atang khan US hian Ukraine hnenah hian thuruk pawimawh tak tak hrilhin sipaiten an bitum lai turte pawh a hrilh thin.
US-in hetiang a hrilh thin a tihtawp hian eng chen chiah nge a huam tih erawh hriat a la ni lo.
Nilainia Fox Business-in an kawmna a tihchhuahah CIA Director John Ratcliffe chuan US-in a puihnate chu ‘chawlhsan rih’ a nih thu a sawi a ni.
“Ukraine nen hian a beitute nawr let kawngah kan thawk dun zel niin ka hria a; mahse, khawvel hi tha zawka a awmna turin muanna a awmna tura inbiakna a awm theih nan kan kal zel a ngai a ni,” a ti.
US-Ukraine inkar hi kar hmasaa White House-a Zelenskyy leh Trump an inhau hnuah khan a chhe zui hle a; mahse, tun karah hian tlemin a ziaawm leh hret.
Trump-a chuan Thawhlehni khan President Zelenskyy hnen atanga lehkha a dawn thu leh Ukrainian hruaitu hian Russia-in a donaah inbiak a awn tih a hrilh niin a sawi.
Zelenskyy-a hian a lehkhaah hian ‘muanna tluantling a awm theih nan a theih anga indawr a inpeih’ tih a tar lang a ni.
“Ukraine-in ram khat a nihna a vawnna tura America-in a puihna zawng zawng hi hlu kan ti a ni,” tiin a ziak bawk.
February, 2022-a indona a chhuah atang khan US chuan Ukraine-ah hian sipaite puihna $ tluklehdingawn 86 vel a thawn tawh niin Centre for Strategic & International Studies chuan a sawi.
Zelenskyy-a lehkha chungchangah hian Kremlin thupuangtu, Dmitry Peskov chuan ‘thil tha’ a nih thu a sawi.
Nilaini khan White House National Security Adviser Mike Waltz chuan Trump-a’n indo titawp tura Ukraine-in inbiak a duh phawt chuan a puih leh nghal tur thu a sawi.