Israel-in a zawn mek Hamas hruaitu lawk pawimawh te

Israeli Defence Minister Yoav Gallant chuan October 7-a Hamas tena an beih hnuah Hamas hruaitu lawk te chu ‘thi mai tur’ tiin a sawi.
A office-ah pawh Hamas commander te chu an thlalak an lal dan indawtin a tar a. A hmasa ber chu Hamas high command te niin chung zingah chuan Muhammed Deif, Hamas militaring wing Izz el-Deen al-Qassam Brigades enkawl tut e, Yahya Sinwar, Gaza a Hamas leader te pawh an tel.
Israel chuan Deif hi October 7 a Israeli 1,200 te thihna mawhphurtu ebrah an ngai a. Deif bakah Sinwar pawh Gaza leader a nihna angin tel veah a ngai a, Sinwart leh Deif te hi Gaza a operation buaipuitu ber an ni dun chungin Hamas organisation chief chu ismail Haniyeh a ni thung. Ani bakah hian Hamas political bureau dintu leh chairman ni thin Khaled Meshal pawh Islamist movement-a hruaitu pawimawh a ni bawk a. Haniyeh leh Meshal te hi chu Qatar ah an cheng mek thung.

Yahya Sinwar
Israeli Defence Force te chuan October 7 thil thlen hnuah Sinwar chu ‘ded man walking’ tiin an sawi a. Khata tang khan mipui hmuh theihin a inlar tawh lo hrim hrim. Israeli officials te chuan Sinwar chu Gaza a bunker khawiah emaw ber a awm an ring a, man emaw tihhlum chu Israel-in a tum ber a ni.
Southern Gaza-a Khan Younis a refugee camp-a piang niin Sinwar chu Israeli awpna hnuaia seilian a ni a. A nu leh pa chu Ashkelon chhuak niin kum 1948 a Israel state-a piang Palestinian te nawrchhuah an nih leh Naba(catastrophe) tia tun thleng an la sawi tuartute an ni a. Kum 1948-49 ve lai khan indona vangin Palestinians 7,00,000 vel chu refugee-in an awm a ni.
Kum 1980 chho atangin Sinwar chuan Muslim Brotherhood a zawm a, kum 1982 khan a tum khat nan Israel-ah man a ni a, kum 19 mi chauh a la ni. Kum 1987 khan Hamas din a ni a, Sinwar chu internal security organisational-Majd a din zui a, Palestinian te Israel nena thawkho nia an hriatte chu an bei vak thin. Kum 1988 khan Israel chuan Palestinian 12 tihlumtu tiin a man a, dam chhung lung in tang tura tih niin kum 22 lung in bang a zut hman a ni.
Kum 2011 khan Sinwar chu lung in tang inthleng tawnah Israel sipai Gilad Shalit leh Palestinian prisoner 1,027 inthleng tawnah a tel ve a, khatih lai khan Hamas te chuan Gaza ah thuneihna an chang tawh bawk.
Chhuah a nih hnuah Hamas security chief hlui ni bawk si, Israeli lung ina kum sawm hnih chuang tang tawh bawk si chu ngaihsan em em a ni a, kum 2017 khan Hamas leadership pawh Gaza bikah ismail Haniyeh hnen atangin kum 2017 khan a la a ni.

Muhammed Deif
Qassam Brigades chief hi Israel in tihhlum tur a tihte zingah kum 2000 atang khan a langsar ber pawl a ni tawh. Kum 2002 khan Israeli strike vangin a mit a hloh tawh a. Kum 2006 khan Hamas leader te punkhawmna building a beih thuta Deif chuan hliam na tak a tuar a, a damchhuak thung. August 2014 khan Deif thah tumin Israel-in airstrike hmangin a bei a, Deif nupui leh fa pahnih an thi a, amah Deif erawh a damchhuak leh a. Palestinians te chuan ‘zawhte nunna pakua nei’ tiin a hming lem an phuah sak nghe nghe.
Khan Younis, Gaza-ah kum 1950 chho vel khan a piang a. Deif hming dik tak chu Mohammed Diab Ibhrahim al-Masri a ni a, Gaza-a Islamic University chhuak a ni a. Muslim Brotherhood ah a tel thin a, Hamas din a nih hnuah Deif chuan a zawm ta a ni.
Intifada protest neih laiin Israeli in a man tawh a ni bawk a, Hamas ah pawh a thleng sang chak hle. Kum 2002 khan second intifada laiin Israel tena Qassam brigades leader Salah Shehade an tihhlum hnuah brigades enkawl tur hian ruat a ni ta a ni. He brigade hi Islamic preacher lar tak British colonialist leh Zionist settlers te tharum hmanga dodaltu Izz ad-Din al-Qassam hming chawi a ni a. Israel te beitute ber an ni.
Deif an Brigade a enkawl hnuah Israel lakah suicide attack kalpui zui ta rengin Israel pawhin a khua leh tui te nunna laksaktu bul pakhatah a ngai a ni. US pawhin terrorist-ah Deif chu a puang zui a ni.

Ismail Haniyeh
Chairman of the Political Bureau of Hamas, Haniyeh hi tunah Qatar ah a cheng mek a. Hamas overall leader nia ngaih a ni a. Sinwar ang bawkin Haniyeh pawh hi kum 1980 chhova Hamas tena radical operation an neiha inhnamhnawih niin Israel-in a man fo zinga tel a ni.
Kum 1992 khan lung in atangin chhuak a ni a. Israel chuan Hamas hruaitu dangte nen southern Lebanon a no-man’s land-ah a chhuak a. A kum lehah Gaza-ah a let leh a. Hamas chhungah a thleng sang chak hle a, movement spoiritual leader Sheikh Yassin office hotu lu ni tura thlan a ni zui a ni.
Kum 2006-a Palestinian Authority tena West Bank leh Gaza-a parliamentary election an neih khan hamas parlimanentay leader a ni a. Islamist group te chuan chakna changin Haniyeh chu ‘prime Minister of the State of Palestine’ a ni zui ta a ni. Mahse, Fatah, President Mahmoud Abbas kaihhruai leh Hamas te inkara a chhe zui a. Abbas chuan kum 2007 khan Hamas sorkar chu a thiat ta a ni. Mahse, Haniyeh chuan Abbas thupek chu pawm duh lovin Gaza-ah rorelna a lekkawh chhunzawm zel a, Fatah te chuan West Bank-ah rorelna an lek kawh ve thung.
Kum 2017 khan Haniyeh chu Hamas leader a nihna atanga inlasawnin Sinwar kaisan theihna a siam a. He mi kum vek hian Haniyeh chu chairman of Hamas’s Political Bureau atana ruat niin Khaled Meshal a thlak a ni.

Khaled Meshal
Hamas dintu zinga tel niin Meshal hi kum 1956 khan West Bank- a piang a ni a, Israel thah tum zinga hun rei tak ata tel tawh a ni. Kum 1997 pawh khan Jordan-a a aawm laiin Meshal chu Mossad ten tura hrai hlum an lo tum hlawhchham tawh a.
Mossad agent pahnih chu Jordanian thuneitute chuan an man phah ta zawk a. Mossad te hlawh chhamna khan meshal chu Hamas ah a dinhmun a siam tha hle ta zawk a ni. Israel-in Hamas leader Sheikh Yassin leh Abdel Aziz al-Rantisi an tihhlum hnuah Meshal chu group overall leader a ni zui a. A kaihhruaina hnuaiah Hamas te chuan kum 2006 pawh khan inthlanah chakna an chang a ni.
Kum 2017 khan Political Bureau chairman a nihna atangin a bang a, tunah chuan hamas overseas branch a enkawl thung a. Hamas chhunga hruaitu zahkai leh thiltithei ber pakhat anga ngaih a ni.