Israel-in Gaza hmar lam a kahnaah mi 50 vel thi

Israel-in Gaza hmar lam a kahnaah mi 50 vel thi
Israeli-ten thlawhna hmanga Gaza hmar lam an kahnaah Palestinian 50 vel an thi niin tual chhung damdawi inin a sawi.
Indonesian damdawi in chuan Thawhlehni zan zankhuaa Jabalia khua leh refugee camp kahnaa thi zingah hian naupang 22 leh hmeichhia 15 an tel tih an sawi a. Online-a video dah chhuahah chuan chhuatah ruang eng emaw zat a awm tih a lang.
Israeli sipai chuan thil awm dan an thlithlai mek tih an sawi a. Palestinian hel pawlin Israel-a rocket a kah avangin Jabalia leh a chhehvela awmte chu insaseng turin an hrilh lawk tih erawh an sawi.
Hetih lai hian UN-a humanitarian affairs chief chuan UN Security Council member-te chu Gaza-a insuatna veng turin hma la turin an ngen.
New York-a Thawhlehnia thutkhawmnaah Tom Fletcher-a chuan Israel chu ‘civil mite chungah zahna engmah nei lovin rawng tak leh mihringte laka chet dan phung lova che’ niin a sawi.
Israel chu chawlhkar 10 chhung Gaza luhna an dan hawng turin a ti a, Israeli-US-in mi mal company hmanga ei tur sem tura a ruahman chu a sawisel bawk.
UN-a Israel palai, Danny Danon chuan an puhna chu ‘tanchhan awm lo’ tiin a sawi ve thung.
Tual chhung damdawi in thuneitute chuan Israeli-te beihnaa thi hi 70 an tling niin Nilaini khan an sawi a, a tam ber hi Jabalia chhehvelah a ni.
Hmar lama chengte chuan zankhuain thil puak thawm an hriat thu an sawi a, video darhah pawh van lamah mei alh sang taka inphuh pawh a lang.
Thawhlehni zanah khan Israeli sipaite chuan ‘final warning’ tichhuakin Jabalia khua, Jabalia camp leh a chhehvel hmun ngaa chengte chu insaseng turin an ti.
Gaza City-ah tlan khawm tura tiin Israeli sipaiten ‘rocket kah chhuahna hmunte chu na takin a bei dawn’ tih a puang.
A hmain sipaite hian Gaza atangin rocket pathum chu Israel-ah kah luh niin ramri hrul leh Sderot khuaa chengte a tibuai hle niin an sawi a. Rocket pahnih chu air force-in kap thlain pakhat chu hmun awlah a tla tih an sawi bawk.
Hamas thawhpui, Palestinian Islamic Jihad chuan ‘Zionist massacre’ chhan let nan rocket hi an kap tih an sawi.
Thawhlehniah vek khan Israeli thlawhnain Khan Younis-a European hospital hung chhung kapin mi 28 vel an thi bawk.
Israel hian October 7, 2023-a Hamas-in an ram luta mi 1,200 chuang an thah leh hren tura mi 251 an hruai phuba lak nan Gaza hi sipai chakna hmangin an bei.
Hemi hnuah hian mi 52,928 an thi tawh a, heng zinga 2,799 hi inkahhai thla hnih an puan hnua March thla atanga beihpui an thlak thar leha thi an ni tih Hamas enkawl health ministry chuan a sawi.