Israel-in Gaza Strip-ah air strike nei

Palestinians 12 an zinga militant group Islamic Jihad commander pathumte chu Gaza Strip-a Israeli air strike avangin an boral.
Palestinian health officials te chuan nunna chan zingah hmeichhia pathum leh naupang pathum an tel tia sawiin hliam tuar 20 vel an awm a ti bawk a.
Israel chuan he chetlakna hi an tih a nih ngei thu sawiin militants te a khua leh tui te tana hlauhawm te dahthat a tumna tiin a sawi bawk.
Islamic Jihad te chuan phuba lak intiam nghalin Gaza-a inbun militant te chuan Israel chu rocket hmanga an kahzui ngei rin a ni bawk.
Gaza Strip thununtu ber Hamas ten militant te chu an pui dawn em tih a chiang lo va, Israel erawh chuan inbeihna awm thei lakah a inpuahchahsa an ti thung.
Israeli indo thlawhna sawm li leh helicopter te chuan Gaza hi an bei a, tualchhung mite a tithlabar hle tia sawi a ni a. Apartment pahnih chu an tichhe hneh hle tih a ni bawk.
Israel sipaite chuan militant pathumte an thlurbing bakah hian ralthuam siamna hmun sawm bakah Islamic Jihas military facility paruk lai an beih tel thu an sawi bawk.
Nunna chante hi Jihad Shaker al-Ghannam, secretary of the al-Quds Brigades’ Military Council; Khalil Salah al-Bahtini, commander Northern Region leh Tariq Muhammad Ezzedine, leader West Bank te an ni.
“Kan martar te, martar nupui leh fate kan sun mek laiin kan martar te thisen hian nasa zawkin min tur a ni,” tiin al-Quds Brigades te chuan an sawi a. “Kan dinna kan kalsan ngai dawn lo va, pathian puihnain kan beizui zel ang,” an ti bawk.
Israel Defence Minister, Yoav Gallant chuan, “Firfiak tupawh Israeli khua leh tui te khawih chu an inchhir ang,” tiin a sawi thung.