China leh Canada-in hnawtchhuak

China chuan Shanghai-a Canada Consul chu Ottowa in Canadian MP vaua puha Chinese diplomat a thawn haw phuba lak nan a thawn haw ve nghal.
Thawhtanni khan Canada chuan China diplomat Zhao Wei chu ‘persona non grata’ a pawm theih loh tia sawiin an ram chhuahsan turin a ti a ni.
Hei hi chhang letin China chuan Thawhlehni khan Shanghai Consulate a Canada diplomat Jennifer Lynn Lalonde chu a hnawt chhuak zui ve nghal bawk a.
“China chuan chet la zui zel turin dikna a nei,” tiin Beijing chuan a sawi zui a. Diplomat pahnih te hian an awmna ram ve ve chhuahsan turin ni nga chhung hun an nei a ni.
Canada politics-ah China-in inhnamhnawihna a nei ru tia sawi a vangin tun hnaiah Ottowa leh Beijing inlaichinnain a chhiat phah hle a.
Canada chuan China chu opposition lawmaker Michael Chong leh a chhungte Hong Kong-a awm te chu Chong-an China chu human rights bawhchhia tia a puh avangin vauah an puh a ni.
Kar kalta Ningani khan Canada chuan China ambassador kovin Canada chuan a inrelbawlnaah China inrawlh a tei theih bau lo tih a lo hrilh tawh a.
Canada Foreign Affairs Minister Melanie Joly chuan Thawhtanni khan Zhao chu an duh lo tia sawiin ‘peesona non grata’ a ti a, hei hi Latin tawng niin ‘lawmloh/duhloh’ tihna a ni.
China chuan Canada chet dan chu ‘principle nei lo’ tia sawiin Lalonde hnawhchhuah chu ‘an tih anga thungrulhna’ tiin a sawi zui bawk.
Ottowa-in Zaho a hnawhchhuahna chhan hi Canadian intelligence report Globe leh Mail newspaper a chhuak zuiah kum 51 a upa Chong-an China-in Uighur minority te a enkawl dan a sawisel vanga Chong leh a chhungte chhui vak zui vang tia sawi a ni a.
China chuan Chong-an ‘anti-China position’ a neih zui zel loh nan Hong Kong-a Chong chhungte chu an chhuizui nghal vak tia sawi a ni.
Zhao hian kum 2021 khan Canada parliament-ah China-in Uighur te laka hleilenna a kalpui chu genocide tiin motion a pu lut a. China chuan he puhna hi hnawlin Chong chu a hrek zui thu a sawi nghal a ni.
Joly chuan Canada chuan ‘ram chhung inrelbawlnaah ram dangte inrawlh kan remti ngai dawn lo’ tiin a sawi a, China consul hnawhchhuah chu ngunthluk taka an ngaihtuah hnua an thutlukna tiin a sawi.
He mi hnu hian Canada spy agency te chu an parliament member te leh an chhungte laka vauna awm thei ang zawng zawng chhui chianga enfiah vek tura tih an ni zui nghal bawk.
China chuan Canada-in Chong leh a chhungte a thlurbing anga a sawi chu dawt muhlum leh inpuhna tenawm tiin a sawi nghal bawk.