Israel-in Hamas te rawtna \ha siamsak ti

US Secretary of State chuan Israel-in a mitangte chhuaha Gaza-a inkahhai remtihna thilphal taka pek a remtih chu Hamas ten an pawm a beisei thu a sawi.
Hamas palaite chuan inkahhai awm theih nana rawtna thar chu Egypt leh Qatar palai te nena sawihona an nei mek bawk a.
Rawtna ang chuan mitang chhuah zalen an nih chuan ni 40 inkahhai puan a ni ang a, chutih chhung chuan northern Gaza a chhungkua tangkhang tam tak te chu an haw remtih a ni dawn bawk a ni.
Hamas tena inkahhai tluantling an ngiat leh duh lam hawiin tawngkam pawh siam a ni tih a ni bawk a.
Hamas palaite chuan Cairo chhuahsan tawhin sawihona an neih leh hnuah ziakin rawtna an siam leh dawn a ni tiin Egypt state-affiliated Al Qahera TV chuan a tarlang.
Israel sorkar chu khawvel ram hrang hrang a thian te leh Hamas tena an hren mitang chhungte chuan nasa takin an nawr reng bawk a.
Nikum 7 October khan Hamas te chuan Israel luhchilhin mi 1,200 chuang an tihlum a, mi 253 an hruai bawk a ni. Israel-in a chhanletnaah Gaza-ah nunna chan 34,480 chuang an awm tawh thung.
Nikum November thla khan inremna siam niin Hamas te chuan mitang 105 an chhuah a, Israel in Palestinian mitang 240 chuang a chhuah ve thung a, kar khat chhung inkahhaina a awm bawk.
Inremna a awma mitang chhuah an nih leh theih nan Egypt, Qatar leh US te chuan a kar akar hma lain an buaipui tawh a, Israel chuan Hamas ten a mi leh sa 133 vel an la kawl mek tia sawiin heng zinga 30 te chu an thi tawh tiin a sawi bawk.
April thla tir lam khan Hamas te chuan Israel-in Palestinian lung in tang za chuang leh kar ruk inkahhai leh Hamas ten an hren mek Israel lung in tang hmeichhia, naupang leh kum upa 40 inthleng tawn a rawtna chu Hamas ten an hnawl a ni.
Hamas te chuan permanent ceasefire an ngiat thu sawi thungin Gaza atanga Israel sipai zawng zawng insawnchhuah vek leh Palestinian te an hawkhawm leh an ngiat tlat thung a ni.
Kar kalta khan Axios news website chuan Israeli officials tena inkahhai a awm theih nana rawtna an siam zingah northern Gaza a Palestinian te let leh remtih te, east-west corridor atanga Israel sipai inlak chhuah te a tel tiin a tarlang a.
Hei mai bakah hian inkahhai tluantling a awm theih nana ruahmanna siam zui zel te pawh a tel tiin official ten an sawi thu a tarlang a ni.
Hei bakah hian Israel officials leh diplomats te chuan mitang chhuah tura an ngiat pawh 40 atangin 33 ah an tihniam tiin tarlan a ni bawk a.
Hamas te chuan Israel rawtna siam chu an zirchian mek thu sawiin tun dinhmunah chuan Israel in harsatna a siambelh leh a nih loh chuan boruak in thatlam a pan tiin an sawi bawk.
US Secretary of State Antony Blinken chuan Riyadh a World Economic Forum (WEF) neihnaah beiseina sang tak an neih thu a sawi a, Meeting ah hian European leh Arab ram aiawh te an tel hlawm a.
“Hamas te hmaah rawtna thilphal tak mai Israel in a hlui mek a ni. Tun dinhmunah chuan Gaza mipui te leh inkahhai inkara awm awmchhun chu Hamas te chauh an ni” tiin a sawi a.
“Thutlukna rang taka an siam a ngai a, thutlukna dik leh tha an siam ngei pawh ka ring a ni” tiin a sawi bawk.
Egyptian Foreign Minister Sameh Shoukry, Israel-Hamas inremna a awm theih nana palai ber pawhin beiseina sang tak a neih thu a sawi bawk a.
“Tuna rawtna hian lehlam lehlam ngaih pawimawh te hrawm tel ve ve in thulaila takin kalpui a ni. Thutlukna siam hian lehlam lehlamah nghawng a nei dawn a, beiseina sang tak nen kan thlir mek a ni” tiin a sawi.
Pathianni khan US President Joe Biden leh Israeli Prime Minister Benjamin Netanyahu te chuan phone a inbiakna an nei a, chutah chuan inremna awm theih nana rawtna lampang an thlurbing dun tia sawi a ni bawk a.
Gaza-a tanpuina tam zawk pek luh a nih theih dan tur te pawh sawi niin US chuan southern city Rafah run chu a la dodal reng tiin president Biden chuan a sawi bawk.
Chutih laiin Israel chuan Rafah khawpui chu indo thlawhnain a la bei zauh zauh reng a. Mahse, khawvel ram hrang hrang ten an nawrna nasa tak karah Rafah runa luhchhuah tak chu a la kalpui bik rih lo a ni.
Hetih lai hian khawlum zual zel chuan Rafah-a chen a tiharsa hle thung a, mi sang tam tak te chu puan in kaih mai mai lum lutukah an khawsa mek a ni.
Fan tinung turin electricity a awm lo va, tuisik vawt pawh hmuh tur a awm lo va, eitur mamawh a awm lo va, nun hram hram nen hmuh leh awm ang ang an ei mai niin Rafah a cheng Sarah Abu Amr chuan a sawi.
Kar kalta khan Rafah ah temperature in 400C a kai a, thla nga leka upa hmeichhe sen chu khawlum lutuk vangin puan in kaih chhungah a thi tiin UN chuan a tarlang.
Hetih lai hian Israel general te chuan Rafah a major operation nei turin ruahmanna an siam fel tawh tih a ni thung a. Rafah-ah hian Hamas battalion la awm leh an leader te chu an awmkhawm mek nia ngaih a ni.
Hetih lai hian US Secretary of State Blinken chuan US chuan Rafah run a nih thutah pawh civilian ten an tuar dawn lo tih ruahmanna an rinngam an la hmu lo tiin a sawi.
Hamas te elpui ber Palestinian Authority President Mahmoud Abbas, West Bank a inbun mek chuan Rafah run a nih loh nana Israel dang thei awm chhun chu US a ni a ti a, Rafah run a nih chuan Palestinian mipui te chunga chhiatna rapthlak ber a thleng ang a ti bawk.
Hetih lai hian Israeli Foreign Minister Israel Katz chuan hostage release deal chu Hamas ten an pawm a nih chuan Israeli sipai ten Rafah an run lo vang a ti ve thung a.
Mahse, far-right Finance Minister Bezalel Smotrich chuan Netanyah chu Rafah run tumna thulh lo turin a ti thung a. Hamas te i nuai chimit thei lo a nih chuan i kaihhruai sorkar hi a tluchhia ang a ti hmak thung.