Israel-in indona puang, Israel nunna chan 1,000 chuang

Israel chuan amah beihna rapthlak ber tawng mekin Pathianni khan Hamas te lakah indona a puang zui bawk a. Hamas te chetlakna avangin Israel mi nunna chan 1,100 an chuang tawh a. Palestinian militant group te chuan Gaza atangin Israel chu an barakhaih a ni.
Prime Minister Benjamin Netanyahu chuan Israel mipuite chu indona hun awh rei leh harsa hmachhawn tura ngenin Hamas te chuan Israel lamah rocket sang tam tak an kap lut tawh a, civilian an man pawh 100 an chuang tawh bawk.
Israel chuan sipai ringawt pawh 700 chuang chân tawhin Israel Defense Forces (IDF) te chuan kum 1973-a Arab-Israel war hnua Israel in hloh a neih hnem ber tiin an sawi.
Gaza official te chuan an ram mipui 2.3 million atangin mi 413 in Israel in a beihletna avangin nunna an chan tawh tiin an sawi ve thung.
Israel-a nunna chan tamna chhan em em hi Gaza border bul maia music festival neihna Hamas tena thalai rual pungkhawm te an beih chiam vang a ni a. He music festival a pungkhawm Israeli leh foreign party-goers te ruang lakkhawm chu 250 a tling tawh a ni.
Hetih lai hian European Commission chuan Palestinians te hnena tanpuina leh chhawmdawlna a pek 691 million euros ($729 million) chu an tihtawp nghal thu sawiin, “He nunrawnna nasa tak Israel mipui te laka kalpui hi kan duh lo a ni,” tiin Oliver Varhelyi, European Commissioner for Neighbourhood and Enlargement chuan a sawi.
Palestinian militant group Hamas te chuan Israel nasa takin an bei a, an fighters te chuan Gaza Strip luhchilhin mi tam tak tihlumin tam tak an man bawk.
Major arlines te chuan Israel-in Hamas te laka indona a puan hnuah Israel tlawh loh an titlu nghal a. American Airlines, United Airlines leh Delta Air Lines te chuan thlawhna thlawhtir lo nghalin US State Department pawhin a khua leh tui te chu fimkhur turin a chah nghal bawk a.
Hamas te chetlakna avang hian United States khua leh tui pakua in nunna an chan tih US chuan a finfiah thu State Department thupuangtu Matthew Miller chuan a sawi a.
Hetih lai hian Israel Prime Minister Benjamin Netanyhu chuan Palestinian silai keng tena Gaza Strip atanga hmun hrang hranga Israel an beihna chuan ‘Middle East a thlak danglam ang’ tiin a sawi.
Israel suipaite chuan Lebanon atanga Israel ram luhna te pawh nasa zawkin venhimna an kalpui zui nghal bawk.

Tute nge Hamas?
Hamas hi Palestinian Islamist militant group te Gaza Strip-a rorel tute an ni. Hamas hi Israel nuaichimih intiama thutiam la an ni a, kum 2007-a Gaza-a thuneihna an chan hnuah Israel nen indona an kalpui fo tawh bawk.
Heng karah hian Hamas te chuan Israel lamah rocket sang tam tak kahluh an remti bawk a, chumai bakah turu tak takin Israel a bei reng fo bawk. Israel pawhin Hamas te chu air strike hmangin a bei zing hle a, Egypt nena tangrualin kum 2007 atang khan Gaza Strip chu a dang chat hmiah tawh bawk.

Eng nge Gaza Strip?
Gaza Strip hi 41km (25 miles) a sei leh 10km a zau niin Israel, Egypt leh Mediterranean Sea kara awm a ni a. Mihring maktaduai 2.3 vel chengin khawvela population density san berna pawl a ni.
Israel chuan Gaza airspace leh shoreline te thunun vekin eng bungrua nge lut leh chhuak a enfiah vek bawk a. Chutiang bawk chuan Egypt pawhin Gaza nena an ramri chu a thunun vek bawk.
Gaza mipui 80% vel zette hi international aid a innghat an ni tiin UN chuan a sawi a. A mi cheng maktaduai khat vel te chu ni tin food aid a innghat bur tiin a sawi bawk.

Eng nge Palestine
West Bank leh Gaza te hi Palestinian territory anga ngaih a ni a, hei bakah hian East Jerusalem te nen Roman hun lai atanga Palestine tia hriat lar a ni.
Chutihrual chiah chuan Bible-ah pawh Juda lal ram tih pawh langin Jews te chuan tun hma atanga an ram ancient homeland anga ngaih a ni bawk.
Israel hi kum 1948 khan mahni a inrelbawl ram anga ngaih niin mahse Israel ram pawmpui duh lote chuan tun thlengin Palestine tiin an la ko zui zel thung a. Palestinians te pawhin Palestine tih chu West Bank, Gaza leh East Jerusalem sawi nan an hmang bawk.

Eng vangin nge Israel leh Hamas an inbeih?
Israel leh Hamas te hi inbakkaih reng an ni a, mahse, kar kalta Inrinni a Hamas te beihna chu thawn lawkna engmah awm lo a ni a. Hamas te chuan Israel lamah rocket sang tel sur tirin an fighters te chuan ramri pela kalin Israel community te chu an run zui a, civilian tam tak thatin an man zui bawk a ni.
Israel chuan air strike hmanga chhang let nghalin Gaza a Palestinian militants te chu a thlurbing ber tiin a sawi zui thung.
Tun inbeihna hi Hamas tena Gaza atanga Israel an beih tawhnaah chuan la turu ber nia sawi a ni a, Israel pawhin kum tam tak chhunga beihna a tawh len ber a ni bawk.
Militant te chuan Israel leh Gaza daidanna wire te chu hmun tam takah palchhiain tuna inbeihna hi Middle East war chhuahsan kum 1973 a Egypt leh Syria tena tangruala Israel an beih thut champha kum 50 chiah a ni.

Israel intelligence hlawhchhamna a ni em?
Israel domestic intelligence Shin bet nena tangkawpin external spy agency Mossad te chu Israel Defense Forces asset ber an ni a. Mahse, tumahin Palestinian te chetlak dan tur an hre lawk lo chu hlawhchhamna turu tak anga ngaih a ni.
Israel hi Middle East-a intelligence service nei tha ber ram anga ngaih an ni a, Palestinian militant group-ah pawh informants leh agents te pawh dahah leh Lebanon leh Syria thleng pawha enthlatu phumru reng anga ngaih a ni.
Chu mai bakah Gaza leh Israel inrina daidannaah camera bakah ground-motion sensors te pawh dah niin army an patrol reng bawk a. barbed-wire fence te chu ‘smart barrier’ nia ngaih niin inbeih tumna a thlen pawha hriattirna pe thei tura ngaih a ni chungin Hamas te chuan awlsam takin an paltlang thei tlat a ni.

Thil thleng zui thei?
Hamas militant commander Mohammed Deif chuan Palestinians te leh Arab ram dangte chu an operation zawm vea Israel te chu nuaichimit turin a ngen a.
Zawhna awm ta chu West Bank leh East Jerusalem leh hmun danga Palestinians te chuan a sawmna chu an pawm dawn em tih a ni ber.
Israel pawhin fimkhurna tur neiin indona kal mek chuan a chhe ber a thleng a nih chuan Lebanese militant group thil ti thei tak Hezbollah te hnuh luh theih an ni a. Pathianni zing lamah phei kha chuan Hezbollah te chuan northern Israel chu missile leh laipui hmangin an kap hial bawk.