Israel-in khua leh tui dan thar siam

Israel Parliament chuan Israel beitu Arab te finfiah an nih phawt chuan khua leh tui nihna hlihsak mai bakah Israel a chen phallohna dan a siam leh Palestinian tena chung Israel beitu chhung te chhawmdawlna a pek te chu khua leh tui nihna paihsak theihna dan chu a pawm fel.
He thutlukna hian Palestinian khua leh tui Israel-a cheng za tam te chu a khawih thei dawn a, hei hi Arab lawmaker te chuan racist tia sawiselin West Bank awp mektu Palestinian officials te pawhin an sawisel na hle.
Internationally recognized Palestinian Authority te chuan Israelis te beih avanga Palestinians nunna chan leh lung ina khungte chhung te hnenah chhawmdawlna an pe reng thin a.
Heng Israel beitu lung in tang te hi Palestinian society-ah chuan ‘hero’ anga ngaih niin Palestinian Authority te chuan an chhung te chu an mamawh engkim a phuhruk sak thin a ni. Mahse, hei hi Israel chuan tharum thawhtute lawmman pekna tiin Israel ram bei zel tura infuihna tiin a sawi ve thung.
Tun dinhmunah Israel beih avanga Palestinian lung in tang 4,700 chuang an awm mek niin Israeli rights group HaMoked te chuan an sawi a. Heng zinga 360 vel te chu Isralei khau leh tui East Jerusalem a cheng te an ni a, East Jerusalem hi ku 1967 Mideast war ah khan Israel in chhuhsaka a awpzui a ni.
Israel chuan Jerusalem khawpui pum hi a capital anga a pawm a ni chungin East Jerusalem bik 1967 indonaa chhuhsaka a awp zui chu khawvel ram tena an pawmpui loh a ni thung a. Jerusalem a Palestinian cheng tam ber te hian Israeli residency rights an nei a, chumi hmang chuan zalen taka hnathawk leh zin veivak theiin Israeli social service tin te an chang thei a, mahse, full citizenship nei lovin inthlanah pawh vote an tlak ve thei lo thung.
Israeli Parliament chuan dan thar a siamah Parliament-ah 94-10 a duh zawk awmin he mi hmang hian thuneitute chuan Palestinian pawi khawih te chu an khua leh tui nihna leh Israel a chen theihna rights an neih chu laksakin West Bank emaw Gaza Strip-ah an thawn lut thei tawh dawn a ni.
Palestinian Authority te hian West Bank-ah autonomy limit tak neiin a pumpuiah chuan Israel in thuneihna a chang tho va. Gaza Strip ah erawh Hamas militant group te thunun a ni thung.
“Israeli khua leh tui leh a chhunga chengte Israel leh society phatsana che a, chutihlaia Palestinian Authority te hnen atanga hlawh la reng a, firfiakna kalpuitute hian Israel khua leh tui nihna leh residency status neia hlawkna an neih chhunzawm zel hi a rem lo” tiin bill sawifiahna chuan a tarlang.
Jewish lawmaker tin te chuan he bill hi an thlawp laiin Arab lawmaker te chuan an duh lo em em thung a. Arab lawmaker Ahmad Tibi chuan bil chu racist tia sawiin Palestinian te chauh a thlurbing a ti a.
“Pawikhawih Arab mi chu conditional citizen a ni a. Jew in pawikhawih ve se in ang renga leh a aia nasaah pawh nise khua leh tui nihna hlihsak chu ngaihtuah pawh a ni ve dawn lo,” tiin a sawi bawk.
Kadoura Fares, head of Palestinian prisoners’ club, West Bank group lung in tang leh an chhungte aiawha ding chuan Israeli dan thar chu ‘hlauhawm tak leh Palestinian Authority te atanga social assistance hmu te an khua leh chenna hmun atanga nawrchhuah tumna a ni’ tiin a sawi a.
HaMoked, Israeli rights group te chuan he dan thar hian Arab khua leh tui 140 leh Jerusalem a cheng mi 211 te chu a tawrhtir nghal thei dawn tiin a sawi bawk.