Israel-in Lebanon a beih chhunzawmah mi 22 thi leh

Ni 45 chhung inkahhai pawhsei ni mah se darkar 24 kalta chhungin Israel-in Lebanon-a beihpui a thlaknaah mi 22 an thi niin an ram health ministry-in a tar lang.
March 2-a Israel leh Hezbollah inkara indona a chhuah leh hnua thi zawng zawng chu mi 3,042 an tling tawh tih ministry chuan Thawhlehnia thuchhuah a siamah a tar lang a, a hma darkar 24-ah khan mi 3,020 thi an awm tawh tih an sawi a ni.
An sorkar enkawl, National News Agency (NNA) chhinchhiah danin zingkar atang khan mi paruk an thi tawh a ni.
Lebanon chhim lam, Nabatieh-ah chuan Israeli indo thlawhna chuan Litani lui hmar lama Kfar Sir municipality-a al-Mahfara venga in pakhat chu a chhu chhe vek a, mi pali an thi a, mi pahnih an hliam niin NNA chuan a tar lang.
Harouf municipality-a thil thleng dangah drone hmangin municipality building bula lirthei ding beih a ni a, mi pakhat a thi a, municipal council member pakhat a hliam bawk a. Lirthei chhunga mi pahnihin hliam an tuar a, pakhat chu a na hle a, beihna hi mi pakhatin khuaa chengte hnena chhang sem tura a inbuatsaih laia thleng a ni.
Bint Jbeil khaw bula Froun municipality-ah pawh Israeli drone chuan motorcycle a kap a, mi pakhat a thi niin NNA chuan a sawi bawk.
Tire district-ah NNA chuan sipaiten al-Mansouri junction-a dawnfawh seng mek lo neitute chu bomb pathum hmanga beih an ni tih a tar lang a. Bomb-te hi lo neitute bulah a tla a, an tlanchhia a, hliam tuar an awm lo hlauh thung.
Israeli sipaite hian Mari-Halta junction-ah checkpoint an siam a, Lebanese pathum an man a, an phone an laksak bawk.
Thawhlehni tlai khan Israeli sipaite chuan Lebanon chhim lama khawpui leh khaw 12-a chengte chu chhuak turin an ti a. Heng zingah chuan Toura, Nabatieh At-Tahta, Habbouch, Bazouriyeh, Tayr Debba, Kfar Houneh, Ain Qana, Libbaya, Jebchit, Chehabiyeh, Burj Shemali, leh Houmin al-Fawqa te pawh an tel.