Israel-in Mo Salah an chhanglet

Nimin lama tarlan tawh angin, Muslim pachal Mohamed Salah chuan Israel sipaiin Gaza City an beihna avanga nunna chan ta, hming lemah pawh Palestinian Pele an tih ve ngat Suleiman Al-Obeid thihna chungchangah Uefa chu demin, a thih chhan leh a thih dan puang tel loa sunna naran ringawt an tichhuak chu a sawisel a, hei hi Israeli military thupuangtu chuan rawn chhanglet nghalin, Suleiman-a chu Israel kut tuara thi a ni chiah em tih finfiahna a ngiat ve nghal.
Karliamta Inrinni khan Gaza club Al-Shati striker ropui ni thin, kum 41 mi nia thi ta Suleiman Al-Obeid-a kalsan a nupui Doaa al-Obeid chuan a pasal inkhelh thin laia Gaza club tana blue-and-white number 10 short a hak thin ngei mai kha kuah chungin a fate panga nen Gaza City-a puan in kaih chhungah a pasal a sun a; Uefa lamin thuchhuah an siamah Al-Obeid thihna pawi an tih thu an tarchhuak a, chu ringawt chu Liverpool forward Mo Salah chuan duhtawk loin Europe football thuneitu sang ber chu Palestinian footballer thih dan leh a thihna hmun, eng vang chiaha thi nge a nih tarlang tel turin a phut ta a ni.
Palestinian Football Association (PFA) thuchhuah chuan Obeid chu Israeli military-in Gaza chhim lam an beihnaa thi a nih thu tarlangin, US leh Israel thawhdunnaa Gaza mite ei tur phurhluh a lo channa lamah Pele of Palestinian soccer an tih hian a nunna a chan niin an sawi a, a chhungte pawhin Suleiman al-Obeid hi Israel tank atanga kah chhuahin a tihlum niin an sawi ve bawk.
Obeid-a nupui Doaa chuan a pasal-in Al-Shati kekawrbul hak thin chu a pasal kalsan zinga hlu ber a nih thu tap chungin a sawi.
Kumina Israel sipaite’n Gaza an beihnaah khan an in pawh bomb chhiat zinga a tel ve avangin Suleiman-a nupui fanaute hian an pa hriatrengna tur kawl-a-bar an nei tawh lo a, Gaza City daifema puan in kaihah chhawmdawlna ei tur nghakin an thu a, an pa inkhelh kekawr chu an neih hlu ber pawl a ni ta!
A thiamna leh goal khung theih avanga Palestinian fans leh PFA lamin Brazilian great Pele nen hiala an khaikhin ve thin Suleiman al-Obeid-a thihna chungchang an puanchhuah danah Egypt forward Mohamed Salah a lawm lo a, Israel sipaite’n Palestinian player ropui an that tih tarlan a ni lo chu a hrethiam thei lo a, X kaltlangin Salah chuan, “Engtia thi nge a nih, khawi hmunah nge, engvangnge tih min hrilh tel thei lo em ni,” tiin Uefa a zawt.
Israeli military spokesperson Nadav Shoshani a ter ve nghal at a, “Hey Mohamed, tunhnai thil thleng kan thlirletna hmasaah Suleiman al-Obeid chungchang record engmah kan hmu lo a nia aw. Chiang lehzuala thlir thei turin chanchin hriat belh ngai kan la nei,” tiin an sipaite chetnaah Palestinian footballer lar a thi tel ve tih nemnghehna an la neih ve loh thu a sawi.
Palestinian national team tana khel thin Obeid khan a lo upat deuh hnuin ram tana inkhelh bansan mah se a thih thleng khan Gaza-ah a club vawn lai a la thlah lo a, October 2023 atanga Israel leh Hamas indona avangin inkhel mumal thei tawh rih lo mah se a thih thleng khan Al-Shati player a la ni reng a, kum 50 a tlin thlenga goal thun a la tum thu a sawi nghe nghe.
A nupui Doaa chuan, “Nitinin training turin a la chhuak ziah a, ni khat te mah a la chawl lo.
“Indona avangin rocket leng chum chumin, bomd puak ri ul ul mah se mite thi buaih buaih karah pawh inkhel turin a la chhuak zel a, a thiante leh a khelhpuite nen an la practice hram hram thin,” tiin a pasalin football a ngainatzia a sawichhuak.
Palestinian Football Association thuchhuah chuan Israel sipai beihna avanga an ram infiammi leh sports official za chuang thih tawh thu puangin, an sports hmunhma leh bungruate pawh a chhiat zawh titih tawh thu an tarlang tel.
Gaza City-a lu met pakhat Hassan al-Balawi an tih chuan French great Thierry Henry nen pawh Suleiman kha naupangte chuan an khaihkhin thin thu sawiin, “Kan naupangte chuan ‘Henry and Pele of Palestine’ tiin an sawi thin.
“He player hi chu Africa ram an sakhi chi khat gazelle ang mai a ni a, khelmuala perh luh tawh hi chuan Palestinian soccer fan zawng zawngin Captain Suleiman al-Obeid kha an hlimpui thin,” a ti.