Israel leh Palestinian te inkarin chhiat lam pan zual zel

Israeli sang chuang te an zinga minister te pawh telna chuan West Bank-a Evyatar outpost chhuahsan takah settlement expansion thlawpin an pan a, tun hnaiah Israelis leh Palestinians te inkar a chhe zual hle.
Israeli flag te vaiin leh sakhuana auhla te leh zaiin outpost an pan a, a bul lawkah Palestinian-te chuan an lo chhawn ve thung a. Palestinian red Crescent te chuan counter-protest an neihna lamah Palestinians 191 in hliam an tuar tiin a sawi.
“Evyatar outpost hi dan ang thlapin coalation agreement kan siam tihhlawhtlinna tura thlawptu ka ni” tiin Shlomo Goren, central city Bet Shemesh a Biologist he kawngzawhnaa tel chuan a sawi a.
“Tunah chuan national guard din a ngai a ni kan tih chu an hrethiam tawh ang” tiin far-right security chief Itamar Ben-Gvir chuan a sawi bawk.
Israel chuan kar kalta khan Ben-Gvir tena an ngiat Arab unrest thlurbing bik tur national guard din a remti a. Tun hnaia Palestinian tena Israelis te an beihna kumin kum tir atangin Israelis 19-in nunna an chan phah tawh a ni.
Hetih lai hian kar kaltaa West Bank-a Israeli hmeichhe unau kahhlum an niha an ruala an hliam tel an nu ber pawhin damdawi In ah a nunna a chan zui tiin official te chuan an sawi a. Heng mite tihlumtu Palestinians te hi Israeli forces te chuan man ngei tumin an la umzui reng thung.
Israeli sorkar far-right te chuan settlement thlawpna leh tihlenna lam policy an siam nual tawh a. Thla kalta pawh khan Israeli parliament chuan kum 2005 a dan siama West bank a settlement pali te chhuahsan tura lo tihtawh te chu an let leh theihna tur kawng a hawnsak bawk a. Hei hi Palestinian Authority leh European Union te chuan an sawisel a.
February thla pawh khan Israel chuan West Bank outpost dan kalha siam pariat tia sawi te chu a pawmpui tawh a, international organization ten an sawisel nasa hle thung.
Kum 1967 a indona thlen hnuah Israel chuan Palestinian tena an ram nia an chhlah settlement 140 vel a siam tawh a. Hei mai bakah hian heng hmuna chengte chuan sorkar phalna la hmasa chuang lovin outpost an siam nual bawk.
Palestinian te chuan West Bank leh Gaza chu la hranga independent ram nih an ngiata East Jerusalem chu an capital tura an hisap a ni bawk.