Israel mithiamin loneitute zirtir

Centre of Execellence for Fruits Lunglei, Haulawng hmuna awmah Thawhtanni khan Israel mithiamin loneitute hriat tur a zirtir.
Embassy of Israel – MASHAV (Israel’s Agency for International Development Cooperation) Agriculture attache Yair Eshel chuan CoE Lunglei, Indo-Israel Village of Excellence ni bawkah hian loneitu thlanbikte hriat tur a hrilh a. Thlai chingtu an nih angin an thlai chinten an beisei anga rah a chhuah loh changa an rilru hreawmnate a hriatpui tih a sawi. Kum 2018 atang khan thlai chin leh thar hlawk na tur lamah Israel leh India/ Mizoram thawkho tawhin, thlai thar chhuah that lehzualna atan theihtawp an chhuahpui thu leh technology tha ber ber hmang tura an puih thu a sawi.
India ram hmun hrang hranga Israel-in Centre a enkawlah Mizoram chu a har ber niin Israel mithiam hian a sawi a. Zoram sik leh sa leh ram hmelhmangin a zir loh vang niin a sawi. “Chuti chung chung chuan theihtawp kan chhuah zel ang. He state tan hi chuan ruahmanna tha zawk siam a ngai a, chu chu hmunpui lamah pawh ka lo thlen anga, kan technology ah chuan tui pek hi kan chhuan ber a ni a, leitha hman dan leh hman tur dik, hman hun tha hi kan ngaipawimawh bawk. Rannung laka thlai ven hi Israel chuan kan ngaipawimawh viau bawk. Thlai rah seng hnu a, market a thlen hmaa sawngbawlte hi kan uluk a, chu’ng zawng zawng chu kan ngaihtuah sak chho zel dawn che u a ni,” a ti.
CoE project officer Hunlawmawma chuan Yair Eshel hian CoE tana theihtawp a chhuahpui thin a, a zarah hmasawnna tam tak an hmu tih sawiin, lawmthu a hrilh.
Israel mithiam Yair Eshel hian Mizoram enkawl tura a term hmangzo tawhin, tun tuma a tlawh hi a zin hnuhnun ber a nih a rin thu a sawi a. Haulawnga zan hnih a riah chungin chhunlamah kuthnathawktute hmalakna a hmunah a enkual dawn a ni.