ISUA THUSAWI THINTHAWNG BER

Rev Dr Ramengliana
“‘Lalpa, Lalpa,’ mi ti nazawng chu vânramah an lût lo vang a, ka Pa vâna mi duhzâwng titute erawh chu an lût ang.”
Heta Isua thu sawi hi thu thinthawng ber pawl a ni awm e. Inti sakhaw mi nazawng, inti piangthar nazawng, inti thlarau nazawng, inti thlarau nazawng chhandam an nih dawn lohzia a sawi a nih hi. Lal Isua ringtu nia insawi pangngai ve mai mai hi vanram kaina a ni lo va, Kristian intih ve ringawt hi ngaihthatna tur a ni lo tih min zirtir hlawm a nih hi. Kan ngaihthat theihna chhan awmchhun chu a thu zawm hi a ni.
Tunlaia kan Chanchin Tha hril tam tak hian ‘thu awihna’, ‘a duhzawng tih’ hi a kal kan ta emaw tih theih a ni thin a. Pathian khawngaihna, kan tih ve tel lo va min chhandamnate, kan nih ang anga min pawm theihziate kan sawi thin lai hian, ama mite chuan a thu an awih thin tih thu hi kan sawi bo lek lek thin. Pathian khawngaihna hnathawh chuan ringtu chu a tidanglam vek a, Pathian thu awih thin nunah hruai lut a ni si a.
He rinna leh thiltih suihzawmtu chu tu dang thil dang ni lovin Thlarau Thianghlim a ni a. Thlarau Thianghlim hnathawh avanga Lal Isua hi lo ring ta kan ni theuh va, keimahniah a hnathawh a chhunzawm zel avangin Pathian duhzawng tihna nun chu a awm ngei ngei thin a ni. Chuvangin, ‘Lalpa, Lalpa’ ti zuah zuah si a, Pathian duhzawng tih ngaihsak miah si lo chu Thlarau Thianghlim atanga chhuak a ni thei lo ni.
“Chumi ni-ah chuan mi tam takin, ‘Lalpa, Lalpa, i hmingin thute kan hril a, i hmingin ramhuaite kan hnawt chhuak a, i hmingin thil makte kan ti thîn lo vem ni?’ an la ti ang. Chumi hunah chuan, ‘Nangni thil sual titute u, ka hre ngai lo va che u, ka hnên ata kal bo daih rawh u,’ tiin anni chu ka la hrilh ang.”
Heta Isua thu sawi hi hriatthiam har tak a nih dan a awm bawk a. Ama hming ngeia thu hril, a hminga ramhuai te pawh hnawt chhuak a hminga thil makte pawh ti ngat thinte pawh a hnawl theih tur thu a sawi tlat hian rilru a tibuai map mai. Hetiang mite hi kan ngaih ‘thlarau’ berte zinga mi an ni bawk si a, Lal Isua hian chhandamna huangah a rin lut ngawt hauh lo. Fimkhur a va ngai em aw.
Lal Isua hian thlarau nunah ‘thil mak’ tih, ‘ramhuai hnawh chhuah’ tih angreng tih theih theih te, a thu hril ve mai ngawt te hi a ropui ber a ni lo, tih a sawi tumna a ni ngei ang a. Hetiang thil zawng zawng hi a hnawl vek tihna erawh chu a ni hauh lo vang. Mahse, a der a awm thei a, thlarau nun tak a lantir chuang lo a tih tumna a ni. Chhandamna tak lantirtu chu thu awihna a ni a. Chu aia tluangtlam, ropui leh pawimawh chu a awm lo a ni.
Chuvangin, kan Lalpa zirtir dan hi chuan thlarau nuna sang tur hian thil danglam em em a awm lem lo. Kan nih phak loh tur leh kan ban phak loh tur pawh a awm lo. A thu thianghlim kan hriat ang ang zawm mai, a duhzawng kan hriat china tih zel mai hi a ropui ber mai. Chu chu a ropui ber a, kan um ber tur a ni zawk a. Mi tam zawkin kan ngaihsan thin tam tak hi chu a ni chuan a hmu sang vak lem chuang lo ni tur a ni.
Chutichuan, heng ka thu hi hriaa, zawm apiang chu mi fing, lungpui chunga in satu nen tehkhin tur a ni. Ruah a lo sur a, tui te a lo lian a, thli te a lo tleh a, chu in chu a rawn nam sawk sawk a; mahse, lungpui chunga rem tlat a nih avangin a chim lo.”
Imphala kan awm laiin na angreng takin lir a nghing a. Concrete building a tlu nual a, a hmuna va hmuh ngei pawh ka nei. Vanduaina nasa tak a nih mai piah lamah a neitu tan in sang tam tak zinga tlu bik nih kha a zahthlak hlein ka ring. In sak an thiam lo bik emaw, an uluk lo bik emaw, an ngaihsam bik lutuk emaw, mi tam tak zinga a bik emaw an ni thei si a. Harsatna inang tlang theuh an hmachhawn a, mi dang an him thup laiin an tuar bik ta mai si a ni.
Lungpui chunga in sak tehkhin thu hi Lal Isua sawi zingah rau rau pawh a tha ber pawl a ni hial awm e. A awmzia hi rilin thuk hle mah se hriat thiam awlsam tak a ni a. Foundation tha taka innghata in sak chu a nghet a, a tlu mai mai thei lo a, chutiang chunga in din chu a finthlak a ni. Senso erawh a tam a, hun pawh a duh rei thin tih erawh chu a lang mai a. Awlsam taka din mai mai thei ni lo mah se lungpui chunga sak a nih miau avangin ‘tui lian,’ ‘thli pui,’ a do zo tlat a nih hi. Tha leh zung kal ral tam mah se harsatna runpui a lo thlen meuh chuan dinhmun awhawm takah an ding daih a ni.
Lal Isuan ‘lungpui chunga in sak’ a tih hi awmzia hi kan hre chiang lovang tih a hlauhawm thung a. ‘Ka thu hria a…’ tiin a tawp duh lo va. ‘…zawm apiang chu…’ a ti chhunzawm kher a nih hi. Hretu nih chauh a tawk lo va, zawmtu ni a pawimawh tel. Khawvelah hian thu tam tak a awm a, tuipui leh ngaihnawm tih, zawm chak zawng tam tak a awm thin. Mahse, Lal Isua thu hria a, zawmtu nih erawh chu mi fing lungpui chunga in sa nen tehkhin tur a ni.
“Heng ka thu hi hriaa zawm si lote erawh chu mi a tiauvut chung maia in satu nen tehkhin tur a ni. Ruah a lo sur a, tui te a lo lian a, thli te a lo tleh a, chu in chu a rawn nam sawk sawk a, a chim ta a, a sawp rup mai a ni,” a ti a.
|iauvut chunga in sak chu harsatna leh buaina a lo thlen hmang zawng chuan nghet ve tak a ni. Lungpui chunga in sak nen a danglamna a awm miah lo. Thla leh zung, sum leh pai senso zawng zawng ngaihtuah phei chuan finthlak tak a ni zawk a. Mi remhria nih an hlawh a, khawvel nuam an tiin a lang a, mi vannei nia hriat an awl. Mahse, ruah sur hma, tui len hma thli tleh hma daih chauh a nih reng an hre lo.
Lal Isua hian hringnun awmzia a man chiang hle. Harsatna leh buainain min nangching theuh thin tih a hre chiang khawp mai. Chu chuan hausa, rethei, milian leh mite a thliar lo. Lei hringnunin a huam tawh tumah kan tlanchhe thei lo a ni. Tin, kan chatuan hmun tur hmachhawn hun kan nei ngei ngei dawn bawk. Chutiang hun pawimawh berah chuan tiauvut chunga in satu chu mi vanduai ber leh mawl ber a ni ta zawk. A inhumhimna tura a sak zawng zawng a sawp rup mai dawn si a.
|iauvut chunga in sak tawpna kan Lalpan a sawi dan chu ‘A sawp chu nasa tak a ni,’ tih kha a ni thin a. Pathian thu awih tul ti lem lote hi a tirah chuan che tha viauin han lang thin mah se a tawpah chuan ‘sawp rup’ bak beisei tur a awm lo. Chanchin |ha hriaa zawm si lote a tehkhinna thu hi harhpui tham a ni a. Kan hringnun in sak hi chim rup lo turin lungpui chungah ngei i ti tang tang teh ang u. A tawpa fing leh fing lo kan awm dawn si a.
(Matthaia 7:21-27)