Palermo-a chengte chuan police car-a an hnawh luh chu tu nge a nihah ngaihdan an siam thiam lo. A chhan ber pawh kum 30 chuang lai vantlang hmuh tura police te mi man chu a inlan tawh ngai loh vang a ni.
Mahse, amred forces za tel tehmeuh palermo kawtthler zim taka an pungkhawm chuan chuti khawpa misual pawimawh chu mi pakhat chauh a awm tih erawh an rilruin an hre nghal thung.
Matteo Messina Denaro – ‘boss of the bosses’ an tih hial chu hmuh a nih tlat vang a ni a. Man a nih hnuah mipuiin kut an beng a, a thenin police te an chibai hial a, a thente an inkuah a, thenkhatte erawh an mittui a tla thung.
-- Advertisement --
Maria Falcone chuan Denaro an man lai chu a uanaupa khan hmu thei se a tih ngawih ngawih thu a sawi zui a.
Ant-mafia magistrate Giovanni Falcone chu Messina Denaro kaihhruai Sicily’s Cosa Nostra ten kum 1992 khan an tihlum a ni. A hun lai kha ‘massacre season’ ti hiala sawi niin kum 1990 chho velah khan Italy chu mafia boruakin a khat a ni.
Khatih lai khan messina Denaro kaihhruai syndicate te chuan an mafia pui jail tangte hrehawm taka an tan duh lova thuneitu ten nun nuam zawka an tantir ngiatin murder campaign an kalpuinaah mi 20 chuang an that a ni.
Messina Denario ngat phei chuan a mi thahte chuan thlanmual an khat hial ang tiin a la uanpui zawk bawk a. Kum 1993-a mafia bansana thuhretua tang Giuseppe Di Matteo fapa kum 11 mi lek thah thu a ni bawk a. He mipa naupang khawngaihthlak tak hi kum hnih an hren hnuah an that a, a ruang pawh a chhung tena an vui loh nan acid in an chiah zawp ral vek a ni.
Hei mai bakah hian Messian Denaro chuan mafia boss dang a hmelma leh a bialnu rai lai te chu a thahtir bawk a. Amah manna tur thupek chhuah a nih hnuah kum 1993 khan a chin hriat lohin a bo zui ta a ni. Zawn zui zel niin Venezuela leh Netherlands-ah te pawh hmuh nia sawi a ni a.
Mahse an man takna chu a homeland Sicily-a Palermo-ah a ni ta thung.
Man a nih hnuah police-te chuan a bikrukna dang hmun pathum lai Palermo atanga 115 km-a hla Campbello di Mazara-ah an hmuchhuak bawk a, he hmun hi a pianna Castelvetrano atanga km 10 leka hla a ni.
Mi cheng tam lohna Campobello hi awlsam taka bihruk theihna anga ngaih a ni lo va. Messina Denaro hi langsar takin hun a hmang an ti bawk. Local Bar San Vito a regular customer a ni, an ti.
Italy hian anti-mafia operation a kalpuinaah sum tam tak a seng tawh a, mahse, police-te laka thupa ngawih thlang tlat mipui nawlpuite avangin organised crime chhut chah a har phah an ti bawk.
Maurizio Bellacosa, criminal lawyer leh LUISS Univerity, Rome a law professor ni bawk chuan Messina Denaro hian man a nih loh nan ‘mafia culture a hmang remchang a ni’ tiin a sawi a.
Mafia culture chu thil hrang hrang invialchiat vek tia sawiin Prof bellacosa chuan, “Mafia tam tak awm vang te, vantlang tena thuneitue engmah an hrilh leh kawhhmuh duh miah lohna te, ngawih an thlan tlatna te, a bik takin khawte zawk leh khaw daifemah te sorkar chaklohna hmunah te a nasa,” tiin a sawi.
Mayor of Campobello, Giuseppe Castiglione chuan Italian media-te hnenah ‘kum khat vel lai kan zingah messina Denaro a lo cheng ve reng tih ka hriat khan min tihnual em em a, a chhan chu ka khua leh tui pui te hian inthlahdah zawk thlangin an lu kaih dak ai chuan hnuai lam melh an thlang a ni’ tiin a sawi.
Mafia boruak hian Sicilian society ah thuk takin hmun a luah a. Hlauhna leh tun hma atanga ngawih an inzirtir tawhna te chuan a la luah hneh hle bawk.
“Mafia te hian tharum leh invauna an kalpui thin a. An laka dik lo nia an ngaih te ngawihtir nan hlauhna an hmang a, chu chu an hlawhtlinna ber a ni,” tiin Bellacosa chuan a sawi bawk.
Palermo prosecutor Maurizia de Lucia chuan Messina Denaro chu ‘Mafia bourgeoisie’ tih mai – local professiona, entrepreneurs leh politician ten an tanpui ngeia a lan thu a sawi bawk a.
Palermo-a journalist Tullio Filipponi chuan mi thenkhat te Mafia te nena thawkho an awm a, mahse, heng Mafia te hian damdawia inenkawl leh inentir emaw, asset management lam mamawh se an hnungchhawn leh nghal thung a ti a.
Heng local network te hi mafia tena an sum an chheprelh phah theihna an ni tiin Filipponi chuan sawiin ‘he culture hi thil danglamna siamtu leh nuai reh ngai a ni’ a ti bawk a.
“Sicilian tin ten Mafia an awm tih an hre vek, chung mafia te chuan vantlang thunun theihna an nei tih pawh an hre vek,” tiin a sawi.
Messina Denaro hi chu pension tawha nun hmang zawk a ni a, criminal activity lamah a la inhnamhnawih reng em a chiang mai lo, amah man hi a awlsam lai ber zawk niin an chetvel nan hriatfiah vek tum chu la khirh zawk tura ngaih a ni bawk.
Car bomb leh tharumthawhna rapthlak pui pui te chu a tawp rih mai thei a, mahse, mithiamte chuan mafia te chu an inthlak danglama chhung lamah insiamthatna an nei nasa an ti.
Mi sum chhuhsak te chu a la reh hauh lo va, chung te a la awm zia lanna chu Denaro man hauh lovin kum rei tak a bikruk theihnain a tichiang bawk.
Chutih rualin Denaro man a nih zinga mipui ten lawm avanga kut an beng hial chu thil inthlak danglam tawhzia lanna nia ngaih a ni bawk a.
Judge tihhlum tak unaunu Falcone chuan mi tin an hlimin an lawm a, kawtthlera awm te, bus a chuangte pawh inkuahin police te pawh an bulletproof vest chhanah an kuah hial a. Italian society tana hnehna a ni, tiin a sawi.
Kum 18-a upa chuan Italian newspaper La Repubblica hnenah, “mipui ten police an chibai leh kuah ka hmuh khan ka thinlung a hneh a ni. He khua hian Mafia khua tih an duh lohzia a pholang a ni,” tiin a sawi a. Zirlai pakhat pawhin, “Denaro man a nih ka hriat khan ka lawm a ni,” a ti bawk.
Kum upa tawh lam te ngaihdan chu a dang mai thei a. Filipponi chuan Sicily-ah chuan kum 60 chunglam kum 1990 chhova inthah vak vakna hre pha chin mahse Messina Denaro tan tlat an la awm tiin a sawi.
“Mahse, thalai zawkte chuan Denaro man a nih avanga kawtthlera an lawmzia an lantir kha thil danglam a ni. Kha khan generation inan lohzia a pholang a, zawi zawiin thil a inthlak thleng a ni,” a ti bawk a.
“Messina Danaro man chu thil pawimawh tawp niin zalenna chikhat ang a ni a. |halai kut beng te kha Sicily history aiawh te niin, Mafia era a tawp ta tihna a ni thei bawk,” tiin Filipponi chuan a sawi.