Arruda hian December 30 khan army chief nihna a chelh chauh a, January thla tir khan Lula administration chuan an pawmpui chauh a ni a. Ban a nih zui tak avangin southeastern army commander Tomas Ribeiro Paiva chuan a thlak ang tiin GloboNews chuan a tarlang.
-- Advertisement --
Zirtawpni khan Lula an military top brass te meeting a neihpui hmasak berah Arruda hi a la tel thung a. A hma lawkin Lula hian thil thleng avanga hmalakna kal zelah a security a sipai thahnem tak a ban bawk.
January 8 khan Bolsonaro thlawptute chuan Brasilia a presidential palace, Supreme Court leh Congress te suasamin tukverh leh furniture te tichhia-in thil hlu tak tak tichhiain graffiti message te hmangin sipai chu sorkar paih thla tur tein an ngen a ni.
Lula chuan kha thil thlengah khan sipaite pawh an inrawlh a rinhlelh thu sawiin mi 2,200 chuang man an ni tawh a. Leftish president chuan ngunthluk taka an enfiah vek tur thu a sawi.
Defense Minister Jose Mucio chuan karkalta Zirtawp khan Lula leh military chief te nena meeting an neih hnuah sipaite chu an inrawlh lo an ti a, mahse, eng emaw hleka inhnamhnawihna an nei a nih chuan khua leh tui te lakah chhanna an pek a ngai ang tiin a sawi.
Armed forces te nena inlaichinna siam that chu Lula sorkar a tihtur pawimawh hmasa ber a ni dawn a. Bolsonaro administration ah khan sipai lam thahnem tak an awm tlat vang a ni.
Chutih lai erawhin armed forces chief thar Paiva chuan sipaite chuan ‘democracy an humhim tlat ang’ tia sawiin inthlan result puan tawhah Bolsonaro pawhin Lula an a hneh chu a pawm mai tur a ni a ti a.
“Vote kan thlak chuan a result kan pawmin kan zah mai tur a ni,” tiin a sawi.
Brazil-a inthlanpui neihah Bolsonaro chu Lula-an a hneh a. mahse, tun thlengin Bolsonaro chuan inthlana a chak lohna chu a la pawm duh chuang lo a ni. Hei vang hian amah thlawptute chu a fuihpawrh zui zel anga ngaih a ni a.
Amah thlawptu tena Brasilia a sorkar hmun pawimawh luhchhuaha an suasam pawh kha Bolsonaro an inthlana a chaklohna a pawm duh loh avanga thil kal zela ngaih a ni.