J Balvin leh Bad Bunny ten Ozuna billion view club record an nihrual

J Balvin leh Bad Bunny ten Ozuna billion view club record an nihrual
J Balvin, Bad Bunny leh Ozua te chu YouTube vawi tluklehdingawn en hlawh thei music video ngah ber an ni ta. J Balvin leh Bad Bunny te hian niminpiah khan YouTube-ah music video vawi tluklehdingawn en hlawh thei 13 an nei tling ve ta chiah a, Ozuna record an nihrual ta a ni.
Balvuin leh Bunny te 2017 music video ‘Si Tu Novio Te Deja Sola (If Your Boyfriend Leaves You Alone)’ chuan YouTube-ah vawi tluklehdingawn en a hlawh ta chiah a, an pahnih tan hian YouTube hetiang zat en hlawh thei music video 13 an neihna ve ve niin, Ozuna record an nihrual ta a ni. He music video hi Puerto Rico-a shoot niin, YouTube-ah March ni 3, 2017-a upload a ni.
2022 khan J Balvin hian Black Eyed Peas a thawhpuina ‘Ritmo (Bad Boys for Life)’ video chuan vawi tluklehdingawn en hlawhin, YouTube-a music video tluklehdingawn en hlawh thei 11 nei Justin Bieber a lehpel a, record a siam a, mahse, a record hi kumin kumtir khan Ozuna hian a rawn khum a, a music video ‘Siguelo Bailando’ leh ‘Diles’ te chuan vawi tluklehdingawn en hlawhin record a siam ve leh ta a ni.
Tunah hian Ozuna music video dang ‘El Farsante’ chuan YouTube-ah vawi maktaduai 977 en hlawh tawhin, tluklehdingawn a rawn hnaih leh tawh hle a, Balvin-a music video ‘Say My Name’ featuring David Guetta leh Bebe Rexha pawhin vawi maktaduai 982 en hlawh tawhin, Bad Bunny music video ‘Bailame Remix’ featuring Nacho leh Yandel pawhin vawi maktaduai 975 en a hlawh tawh bawk a, heng music video pathum te hian kum tawp hmain vawi tluklehdingawn en an hlawh hman ngei dawn niin a lang.