Jail-a thawk tur zat ruahman atangin post za chuang a ruak

Jail-a thawk tur zat ruahman
atangin post za chuang a ruak
Mizoramaj jail 10 a awm a, heng jail-a thawk tur zat sawrkarin a ruahman chu mi 443 an nih laiin, post 327 chiah hnawhkhah a ni. Thawktu zingah pawh hian 68 chu a nghet lo an ni.
Zirtawpni khan Home minister K Sapdanga hoin Central jail leh District Jail hotuten department hmalakna an thlirlet a. Prisons department hnuaia hmalakna leh hmachhawp hrang hrang sawiho a ni.
Inspector General of Prisons R Vanlalsawta chuan sawi danin, Prisons department-ah hian sanctioned post 443 awmah post 327 hnawhkhah a ni a, heng zinga 63 chu provisional employee niin, contract 2 an awm bawk. Mizoram district hrang hranga Department of Prisons enkawl jail hi jail tang 1386 awm theihna tur a nih laiin tunah 1703 an awm mek. Awm tur bituk zat aia tam mi 549 awmin bituk zat aia tam awmna jail chu – Central Jail Aizawl, Central Women’s Jail Aizawl, Aizawl District Jail, Lunglei District Jail leh Champhai District Jail a ni.
Central Jail leh District Jail thawmthatna tur ruahmanna engemawzat peihfel a ni tawh a. Jail tangten tangkai zawka hun an hman theihnan an thiamna tihpunna tur skill development training buatsaih thin a ni. Ar leh vawk vulh, carpentry workshop, computer training, agriculture farming, weaving /handloom/ tailoring leh handicraft training kalpui thin a ni.
Tun thlengin Prisons department-a Inspector General of Prisons post hi mi 20-in an chelh tawh a, IGP hnuaiah DIG Prisons, AIG Prisons leh superintendent awmin, Central Jail-ah special superintendent leh District Jail-ah jail superintendent an awm. 1986 September 15 khan Central Jail Aizawl hi kalpui tan niin, tunah Central Women’s Jail leh District Jail Aizawl bakah Lunglei, Siaha, Champhai, Kolasib, Lawngtlai, Serchhip leh Mamit District Jail a awm a; Saitual, Khawzawl, Hnahthial District bakah Vairengte leh Tlabungah Sub-Jail siam tum a ni.
Home minister chuan jail chu awm tha duh lo hremna hmuna ngaih thin kha tunah chuan insiamtha tura inkaihhruaina leh thiamthil inzirtirna hmuna siam chhoh mek a ni tih a sawi a. Khawtlang ralmuang leh nuam siam turin jail enkawltute inpeknaah thui tak a innghat, tiin, Prisons department-a thawktute hnathawh chu langsar viau lo mah se, an mi enkawlte nunah danglamna nasa tak thlen theitu an ni tih hrereng turin a chah. Jail chu nunkawng dik leh tha inzirtirna hmun a nih angin, jail tangte thunun tur chuan a enkawltuten mahni invawn leh inthunun theih hmasak a tul tih a sawi a ni.