Jail-ah HIV/ TB kai theihna sang
Kai tamna ber state Mizoram
Mizoramah jail a tawt thin avangin natna inkaichhawn theih chi, a bikin HIV leh TB kai theihna ‘chance’ a sang hle tih chu mithiamte hmuh dan a ni a. Hetiang natna, jail atanga kai hmuh thar tamna ber state pawh Mizoram a ni.
HIV leh a kaihhnawih natna inkaichhawn theih chi hrang hrang, tan in (jail) leh khuahkhirh ngai enkawlna hmun hrang hranga hmalakna tur – Integrated STI, HIV, TB & Hepatitis (ISHTH) Campaign chu Ningani tlai khan Health & Family Welfare minister Dr R Lalthangliana’n a hawng a. Mizorama central jail pakhat leh district jail kan neihah te tang thei tur zat aia leta tam an awm laiin, hriselna lama thawktute indaih tawk loh vanga harsatna a awm thin thu sawiin, department hrang hrangin tangruala hma an lakna tur ISHTH campaign chu thla 6 hnu ah a rahchhuah duhawm a lan ngei a beisei tih a sawi a. Covid hrilen laia mipui kan tanrual ang khan HIV do kawngah mitin tangrual ila, tuna kan dinhmun aiin kan tha zawkin a rinawm tih a sawi bawk.
Health & FW principal secretary Esther Lal Ruatkimi sawi danin, kum 2021 chhunga rampum huapa tan ina HIV leh TB hri kai thar nia chhut, mi nuai 62.9 zingah ram pum dinhmun za zela 1.93 a nih laiin, Mizoram chu sang berin zaa 26 a ni a, pahnihna Punjab chu zaa 7.5 niinm pathumna Nagaland zaa 4.6 a ni. Jail-ah hian a awm thei zat aia tam an awm fo thin avangin natna inkaichhawn theih lakah an dinhmun a him lo fo tih a sawi a ni.
Kum 2021-a Central Jail-a tang mi 400 kawmnaah HIV chungchang kimchang taka hria chu zaa 84.3, ruihhloa inchiu thin zaa 7, an tan puite sex hmanpui thin zaa 1.8 an awm. Sex hman hnuhnun bera condom an hman dan zirchiannaah, kawppui nghet te laka hmang zaa 11.7 leh kawppui satliah (casual partner) te laka hmang zaa 25 an ni.
“Thil chiang taka lang chu, tangte zingah hian HIV chungchanga hmalakna kalpui hi thil tul tak a ni a, HIV test, ART damdawi tha taka eitir bakah HIV la kai lote veng tura chak taka hma lak a ngai a ni,” Health principal secretary hian a ti.
ISHTH Campaign hi June thla chhunga hman tur a ni a. He campaign-in a tum ber chu, jail tangte harsatna tawk leh khuahkhirh ngai enkawlna hmun (Home adt) hrang hranga awm HIV, TB, Hepatitis leh STI natna laka an inven theihna’n leh natna neiten enkawlna tluantling an dawn theihna tur a ni a. India ram puma hman tur a ni. Tunah hian India rama jail tangte zingah HIV kai an tam em avanga he campaign hi sawrkar laipui buatsaih a ni. Khawi hmunah pawh a mamawhten enkawlna tluantling an hmuh theihna’na buatsaih a ni. Jail tangte bakah Social Welfare & Tribal Affairs leh Women & Child Development enkawl home hrang hrang leh ruihhlo ngaite enkawlna hmun pawh a huam tel dawn a ni.
Jail-ah HIV/ TB kai theihna sang Kai tamna ber state Mizoram
Get real time updates directly on you device, subscribe now.