An nute jail an tan avangin Mizoram jail pathumah naupang 22 an awm ve mek.Central Women Jail-ah naupang awm ve hi an tam ber a, 17 an ni. Champhai District Jail-ah 3 leh Kolasib District Jail-ah 2 an awm ve bawk. Heng naupang hi an nute jail an tan mek avanga awm ve an ni.
Mizoramah jail 10 a awm mek a, heng zinga 8-ah hian hmeichhe tang 255 an awm mek. Hmeichhe tang zingah damchhunga jail tang tura court-in a hrem an awm lo.
Central Women Jail chu an tamna ber a ni a, 182 an awm. Mi 182 zinga 150 hi chu an court-in an chungthu a ngaihtuah mek (under trial prisoner/UTP) an ni a, an chungthu ngaituahnaa court-in thiam loh a chantir (convict) 32 an awm a, heng zinga 27 chu hrehawm taka jail-a tang tura an chungthu rel (rigorous imprisonment/RI) an ni a, a bak 5 chu hrehawm taka tang tura tih ni lem lo (simple imprisonment) an ni.
District Jail Champhai chu hmeichhe tam leh na deuh a ni a, 25 an tang. Heng zinga pakhat chiah hi jail tang tura court-in a hrem (convict RI) a ni a, a bak 24 chu UTP an ni.
District Jail Lungleiah hmeichhe tang 20 leh District Jail Kolasib ah 15 hmeichhe tang an awm mek a, a tam zawk hi UTP an ni. District Jail Siaha leh Lawngtlaiah hmeichhia pakhat ve ve an tang mek bawk.
-- Advertisement --
8 May 15 thlenga chhinchhiah chinah Mizorama jail 10 awmah tang mipa 1640, hmeichhia 255 leh an tanpui naupang 22 nen, an vaiin tang 1917 an awm mek.
8 Mizoramah an pawikhawihna avanga court-in dam chhung jail-a tang tura a hrem mi 57 an awm a, an zinga 54 hi Central Jail-a awm an ni. District Jail Kolasib ah 2 leh Lawngtlaiah 1 an awm a ni.
8 District Jail Serchhip chu tang thawlna ber a ni mek a, mi 128 awm theihna tura ruahmanah tang 45 an awm a ni.
8 Jail panga – Central Jail, Central Women Jail, District Jail Aizawl, District Jail Lunglei, District Jail Champhai ah te tang awm thei zat tura bituk aia tam fe an tang mek vek a. Central Jail hi mi 438 tan theihna tura tih a nih laiin, 901 an awm. Mi 105 awm theihna tura ruahman District Jail Champhaiah tang 171 an awm a; tang 109 awm theihna tura tih District Jail Lungleiah 149 an awm.