Mizoram Power & Electricity department chuan power supply chungchanga mipuiin harsatna an thlen theihna tura Customer Care Centre a lo kalpui thin chu a tuaithar dawn.
P&E minister F Rodingliana hoin Thawhlehni khan P&E hotute an thukhawm a. Tunhnaia Mizoram hmun hrang hranga power supply khaihlak fo leh power supply mumal leh tha zawka mipui hnena pek theih dan tur an sawi ho.
Mizoram hmun hrang hranga power supply chungchanga harsatna awmte report zung zungna tur Customer Care Centre (CCC) chu nikhata darkar 24 function tura tuaithar leh nise, SE (superentending engineer) level officer pakhatin a bik taka vil se, an ti. CCC kaltlang hian ramchhung khawi lai atang pawhin power supply chungchang harsatna thlen theih a ni anga, duty-ten a changtu division /sub division hnenah an bawhzui turin an hriattir thuai thin dawn a ni.
Transformer chhia avanga kawlphetha pek kawnga harsatna awm chinfel nan state budget-a transformer thar leina tur former tharte company atanga direct-a man tlawm zawka lei dan tur ruahmanna thlirho a ni a. Mizoram hmun hrang hranga kawlphetha pekchhuahna ruhrel siam mekte thlirhoin, heng hnathawh mek thenkhata harsatna awmte chinfel dan tur ruahmanna siam a ni.
Hydel project hrang hrang tuaithar dan tur leh power tam zawk siam chhuak thei turin ruahmanna siam a ni bawk.
P&E minister chuan tunlaiin thli leh ruah avanga kawlphetha pekchhuah kawnga mipuiin harsatna an tawk chu pawi a tih thu a sawi a. Kawlphetha hnianghnara mipui pek a nih theih nan theihtawp an chhuah zel tur thu a sawi. Aizawl khawpui bikah kawlphetha tha zawka mipui hnena pekna tur hna thawh mek, RDSS leh Smart City Project chu hmun thuma then hmunkhat thawh zawh a ni tawh tih a sawi a. Hmasawnna hnathawh vangin power shutdown zauh zauh a ngai rih dawn, tiin, hrethiam turin mipui a ngen a ni.
Mizoram sawrkarin kawlphetha leina man ba cheng vaibelchhe 81 a pek avangin sawrkar chungah lawmthu a sawi bawk.
Harsatna thlenna Customer Care Centre tuaithar dawn
Get real time updates directly on you device, subscribe now.
Prev Post
Next Post