Jaishankar-a Canada zin turin an inkar a tihthat zual beisei

Jaishankar-a Canada zin turin an inkar a tihthat zual beisei
Indian External Affairs Minister S Jaishankar-a chuan Canada-a G7 foreign minister-te intawh khawma tel turin a zin hmel a, ram pahnih inkar chhe tak ni hman hian that lam a pan mek zel karah tha lehzual a nih theih phah beisei a ni.
Ontario-a Niagara region-ah November 11 leh 12 hian intawh khawm a awm dawn a, “Jaishankar-a tel ve tur hi a chiang khat tawh,” tiin thuneitu sang pakhat chuan a sawi.
Jaishankar-a hi June thla khan Canada-a Kannaskis-a G7 Leaders’ Summit-ah khan sawm niin hemi tum hian Australia, Brazil, Mexico, South Africa, South Korea leh Ukraine hruaitute a lo kawm tawh.
Tun tuma a Canada a tlawh leh tur hian ram pahnih inkara neuh neuh awm chu a tihthat lehzual beiseina a awm a, a hma khan Mark Carney-a chuan March thlaa prime minister a nih tan hnu lawkah Indian Prime Minister Narendra Modi chu G7 summit-ah tho a lo kawm tawh bawk.
Hemi tum hian Jaishankar-a hian Modi-a hi a tawiawm nghe nghe a; mahse, Canadian Foreign Minister Anita Anand nen erawh an inhmu lo.
G7 foreign ministers’ meeting an thlen turah Anand-i hian an mikhualte chu a kawm ngei beisei a ni a. Jaishankar-a nen hian an inkawm a nih chuan Canada-a an inbiak hmasak ber tur a ni dawn a. Indian hruaitu hian December, 2019 khan Ottawa leh Toronto a tlawh tumin khatih laia foreign minister, François-Philippe Champagne nen an inkawm tawh a ni.
Anand-i hian tun thla tir khan India a tlawh a, hemi hnuah hian ram pahnih inkara sumdawnna leh investment-a inbiakna pawh an chhunzawm leh tan a. Modi, Jaishankar bakah Commerce & Industry Minister Piyush Goyal te pawh a hmu a ni.
Anand-i leh Jaishankar-a inbiak hi June thlaa Modi-Carney inbiain inkungkaihna thar siam leh tha an tih chhunzawmna a ni ber a. September 29 khan Anand-i hian Jaishankar-a hi New York-a United Nations General Assembly-ah a lo hmu tawh bawk.
India hian Prime Minister Carney-a hi February thlaa New Delhi-a AI Impact Summit-a tel turin an sawm mek bawk a, a pisa chuan a tel dawn tih an la sawi chiah lo va. New Delhi hian April-ah tal a tlawh an beisei mek a ni.
Prime minister hlui, Justin Trudeau-a khan September, 2023 khan Khalistani activist Hardeep Singh Nijjar-a tualthihnaah Indian sorkar mite an inrawlh niin a puh a, hei vang hian ram hnih inkar hi a chhe hman hle a. India hian puhna hi a pha.
Hemi hnuah hian tun hnaiah an inkar hi siam that leh hret hret zel a ni a, Jaishankar-a’n a tlawh theih hlauh phei chuan tha lehzual tura ngaih a ni.