Jamil-a thlitfim leh turah Chhetri a tel

Jamil-a thlitfim leh turah Chhetri a tel
Ram tana inkhelh a chawlhsan hnuah India national men’s football team tlarhma luah tur an daw-rawm chhoh tak em avangin captain hlui Sunil Chhetri chu head coach kalchhuak ta Manolo Marquez khan ram tana inlan leh turin a sawmkir a; a han khel lau lau a, an chak phah lem hlei lo a! Tunah, boss thar Khalid Jamil-a hnuaiah hlawhtling angreng takin CAFA Nations Cup-ah pathumna hial an luah a, Delhi tlangval Chhetri pawh AFC Asian Cup qualifier-a Singapore hmachhawn tur squad hmasaah kohkir a ni leh ta.
30-member probables squad-ah hian Asian Cup-a khelhna hmun chang regular Mizo player pahnih Lallianzuala Chhangte leh Hmingthanmawia Ralte pawh an tel leh.
National team inbuatsaihna camp hi Bengaluru khawpuiah September ni 20 atang hian an tan chho leh tawh dawn a, camp luh tan ni hma hian player-te chu South Indian khawpuiah hian in report tura tih an ni.
Hetih lai hian AFC Champions League 2 khel tur Mohun Bagan SG leh FC Goa atanga player kohna hmasa dawngte chu September ni 20 thlen hma nia an in report ve kher a ngai dawn lo a, khawmualpui huap inelna an khelh zawha camp an zawm phalsak an ni.
Anni bakah hian player pangate chu standby-ah dah niin, an zinga pahnihte hi U23 men’s national team player niin, pathum dang chu senior player-te an ni.
Bengaluru camp-ah hian 2027 Asian Cup Qualifiers Group C final round match hnih khel turin team an inbuatsaih dawn a; tah hian Singapore nen match hnih khelin, a hmasa zawk chu October ni 9 khian National Stadium-ah a ni ang a, a dawttu chu October ni 14 khian Jawaharlal Nehru Stadium, Margao, Goa lamah an khel chhunzawm leh ang.
National camp-ah hian player 30-te an han training lauh lauh ang a, coach-in awm tawk a tih hunah probable-te atang hian match hnih khel tur final squad la thlanchhuah leh tur a ni.
Tunhnai lawka Uzbekistan leh Kazakhsta ram lama khelh zawh tak CAFA Nations Cup kha national team a enkawl hnua Jamil-a’n inelna (tournament)-a national team a hruai vawi khatna niin, kha mi tum kha chuan head coach hian Chhetri a hahdamtir a, Singapore nena game hnih khelh tur hi chu a pawimawh dan a thuk tak deuh avangin a ko lo phal ta lo ni berin a lang!

30-member probables

Goalkeepers: Amrinder Singh, Gurmeet Singh, Gurpreet Singh Sandhu.

Defenders: Anwar Ali, Bikash Yumnam, Chinglensana Singh Konsham, Hmingthanmawia Ralte, Muhammed Uvais, Pramveer, Rahul Bheke, Ricky Meetei Haobam, Roshan Singh Naorem.

Midfielders: Ashique Kuruniyan, Danish Farooq Bhat, Jeakson Singh Thounaojam, Jithin MS, Macarton Louis Nickson, Mahesh Singh Naorem, Mohammed Aimen, Nikhil Prabhu, Suresh Singh Wangjam, Vibin Mohanan.

Forwards: Irfan Yadwad, Lallianzuala Chhangte, Manvir Singh (jr), Mohammed Sanan K, Muhammed Suhail, Parthib Gogoi, Sunil Chhetri, Vikram Partap Singh.

Head Coach: Khalid Jamil.