Jamil hnuaia India beiseina thar

Jamil hnuaia India beiseina thar
Hisor, Tajikistan-a 2025 CAFA Nations Cup khelh zawh takah head coach thar Khalid Jamil-a hoin Mizo footballer pahnih Lallianzuala Chhangte leh Hmingthanmawia Ralte telna India chuan leilung awm tirh ata an la hneh ngai reng reng loh Oman hnehin pathumna an hauh pha a, hun rei tak tualchhung coach ruai loa foreigner ring zawk Indian men’s football team chhungah beiseina thar a piang ta!
Thawhtanni Hisor Central Stadium-a inkhelah Blues Tigers chuan hun pangngaiah Fifa ranking-a an aia sang zawk Arab team kha 1-1-in an inhnehtawkpui a, penalty hmanga chak zawk zawnnaah 3-2 hnehna nen a tum khatna atan West Asian ram hi an hneh ve ta a ni.
Kha game-ah khan LZ-a leh Valpuiate’n a tir atanga lutin bul an tan a; penalty shoot-out hmanga chawk zawk zawnnaah Lunglei tlangval Lallianzuala chuan India tan goal a chhuihlut nghe nghe.
Kum 2000 atanga chhiar tanin India leh Oman hi vawi kua an lo intum tawhah vawi ruk ngawt Blue Tigers an tlawm a, vawi thum dang chu an inhnehtawkpui ve chauh kha a ni a, boss thar Jamil-a hnuaiah erawh a dan a dang ta zak a, an la hneh ngai reng reng loh laka history thar ziam chungin CAFA Nations Cup-ah pathumna an hauh pha.
Thawhtanni inkhelah khan first half-ah goal lut loin, second half tir lam minute 55-ah Jameel Al Yahmadi chuan Oman hmahruaina goal a khung a, thilmak a ni hran lo!
India hi hun dang tam zawk ang bawka tlawm zui leh mai tura ngaih an nih laiin hun pangngai tawp hma minute 10 la awmah Udanta Singh Kumam chuan an siphurh a sut nawlh a; minute 96-ah Oman defender Ali Al Busaidi hnawhchhah ni bawk mah se extra-time minute 30 chhungin player pakhata tam zawk India-in goal dang a khung belh zo lo a, penalty hmanga pawhthen nge nge an ngai.
Shootout-ah hian Lallianzuala Chhangte, Rahul Bheke leh Jithin MS-te’n India tana an chhuihluh laiin Anwar Ali pet chu dansak a ni a, India tana spot-kick chhuih dang Udanta pet chu dansak a ni.
Hetih lai hian Oman lamah Thani Al Rushaidi leh Muhsen Al Ghassani-te chauhin Gurpreet Singh Sandhu ven goal-ah ball an thawnlut zo a; Harib Al Saadi leh Ahmed Al Kaabi-te chuan an thelh hrim hrim a; chu tah Sandhu chuan he game-a gal chhuih hnuhnungber ni ta Jameel Al Yahmadi pet a dang a, hun puma ball chang tam zawk Oman lakah India an chak ve ta nge nge!
Goal chance neih tam lamah chuan team pahnih kha an intluk thial a; tlarhma sir tawn tawn atanga LZ-a leh Vikram Partap Singh hmanga India counter attack kha a hlauhawm ve fo.
Ti chuan…
Fak hlawh ta ber chu India head coach thar Khalid Jamil a ni lo thei lo a, national team coach ni chunga a bultanna hian Indian men’s football-ah beiseina a thlen chiang hle a ni.
Omani game-ah khan Aizawl FC boss hlui game plan hmuh tur a awm leh a, team inthununna tha tak kara goal venhim ngaihpawimawh boruak ‘Khalidball’ an tih mai hmangin India tana hneh theih loh ang hiala inlan hman tawh Arab team an tukdawl miau a!
Thla thar mai hian AFC Asian Cup qualifying double-header lamah Singapore an hmachhawn zui leh dawn a; khawchhak team pawh hi India aia ranking nei sang tho niin, Blue Tigers tana chak mamawh san em emna game a ni leh dawn.
Tournament thlirletna
Khalid Jamil era a intan hlawt tihah India hian Oman baka an hneh zen zen loh dang Tajikistan pawh an hneh a; India a enkawl hnua a game hmasa palia Jamil-a record kha a chhe lo takzet a ni.
Tarlan tawh angin, CAFA Nations Cup-ah khan Jamil-a hnuaiah India chuan ‘defensively solid’ an ngaipawimawh a, ranking-a sang zawk team tan pawh India tlarhnung suttlang a khirh ta fuat a; goal thun tura an hun tha hmuhah India tlarhma an ter ve ta at bawk!
Tun tournament chhung khan game li khelhah goal nga chiah an chhuah a, chu’ng zinga pathum chu FIFA ranking tehnaa an aia pen 100 chuang zeta sang Iran laka an phurh a ni.
Tajikistan ram tournament-ah khan India chu team chhuak zinga ranking nei hniam pathumna niin, Turkmenistan leh Afghanistan tih loh kha chu an aia sang vek an ni.
An game hmasaberah Fifa ranking lama ai aia pen 27 zeta sang leh tournament thlengtu ni bawk Tajikistan an han hneh nghal pang a, kum 17 chhunga Tajikistan an ngam vawi khatna a ni.
Ranking-a an aia pen 54 laia sang zawk Oman hneh chungin tournament an khar a, Oman nen belhkhawma tum 11 an intum tawha India chak vawi khatna niin, a hun lai Indian top flight-a budget nei thaw rawng em em Aizawl FC champion-pui nalh thei Khalid Jamil-a hun intanna chu khati ang kha a ni e!