Japan-a nurse hna thawk tur Mizo thalai 14-te chu National Skill Development Council – International (NSDC-I) tumsakin Delhi-ah Japanese tawng thla 9 chhung an zir dawn a, Nilaini khan Labour, Employment, Skill Development & Entrepreneurship (LESDE) minister Lalchhandama Ralte chuan a vailiam.
-- Advertisement --
Japan leh India sawrkarin thawhhona thuthlung an siam angin Japan-a nursing care thawk tur thawn luh hna hi NSDC-I hian a kalpui a. India rama pilot programme atan nurse 50 thawn luh phawt tum a ni. Mizoram LESDE department hmalaknain Mizo thalai nurse hna thawk tur a tum khat nan mi 6 kaltir tawh niin, tunah a tum hnih na’n mi 14 kaltir leh tum a ni.
LESDE minister chuan Japan rama nurse hnathawk tura kal turte chu Mizoram tan ‘ambassador’ an ni, tiin, Mizo thalai tam zawkte tan eizawnna kawng sialtu pawimawh tak an nih avangin rinawm leh taima taka thawk turin a fuih.
Administrative Training Institute core faculty Golda Dell Zohmangaihi chuan tawng zira kal turte tana tangkai tur leh fuihna thu a sawi a. LESDE director Angela Zothanpuii chuan an training dan tur leh hriat tur pawimawh a sawi. He hunah hian NSDC regional manager (NE) Smita Chetia Talukdar leh engagement officer Masotmi Zimik te an tel bawk.
Tun tuma thlahliam tak mi 14-te hian thla 9 chhung training an neih zawhah an thawhna tur biakfel sa hmunte sawrkarin a enfelsak zawhah Japan-ah hna thawk turin kaltir an ni anga, an kalna senso leh tuldang hi an thawhna tur ten an tumsak dawn a ni. Mizoram atanga Japan-a nurse hnathawk tur mi 20 thawnchhuah tawh bakah hian Mizo thalai ramdanga hnathawhna rintlaka thawk thei turin LESDE department hian hma lak chhunzawm zel a tum a ni.