Kum 2050-ah India-ah rit lutuk maktaduai 440 chuang awm dawn

Kum 2050-ah India-ah rit lutuk maktaduai 440 chuang awm dawn
Kum 2050-ah chuan India-ah thau lutuk leh nih dan tur aia rit mi maktaduai 440 chuang an awm tawh dawn niin khawvel puma zirchianna, The Lancet-a tihchhuahah tar lan a ni.
Kum zabi kal mek laihawlah hian India-a mipa maktaduai 218 leh hmeichhia 231 chu rit uchuak an ni dawn a, China dawta a tam berna ram ni turin an chhut lawk a. India hnuaiah hian US, Brazil leh Nigeria an awm dawn niin khawvel pum huapa zir chiangtuten an sawi.
Global Burden of Disease (GBD) Study 2021 tih hminga zir chiannaah hian Indian Council of Medical Research (ICMR) pawh an tel ve.
Kum 2021 khan khawvel puma puitling kum 25 leh a aia upa zahve dawn, mipa leh hmeichhia tluklehdingawn khat vel ve ve chu thau lutuk leh rit lutuk an ni a. Heng zinga maktaduai 180 dawn – mipa maktaduai 81 leh hmeichhia maktaduai 98 chu Indian an ni.
Kum 2050-ah chuan khawvel pumah thau lutuk hi tluklehdingawn 3.8 dawn – mipa tluklehdingawn 1.8 leh hmeichhia tluklehdingawn 1.9 an tling tawh a, ‘hetih hun laia khawvela puitling chin zahve chuang’ an tling tawh dawn niin an sawi.
“China, India leh USA-ah thau lutuk leh rit lutuk hi khawvela a thawh tam ber an ni chhunzawm zel dawn a, Sahara thlaler vela ramte-ah 254.8% zetin an pung bawk ang,” tiin zir chiangtuten an ziak.
India-ah hian kum 2050-ah chuan kum nga leh 14 inkar mipa naupang maktaduai 16 chuang leh hmeichhe naupang kum 14 chuang chu rit lutuk leh thau lutuk an ni dawn a, China dawt an ni ang.
Kum 15 leh 24 inkar, khawvela thau leh rit lutuk tam ber rualah India-ah hian kum 2050-ah chuan mipa maktaduai 22 chuang leh hmeichhia maktaduai 17 dawn an awm dawn bawk.
Zir chianna tihchhuah thara India-a thau leh rit lutuk tam tur a lan mek lai hian tun hnai lawk, February 23-a Prime Minister Narendra Modi-a’n thla tina radio-a thuchah a sawi, ‘Mann Ki Baat’-ah thau lutuk tam chu beih leta titawp tura hmalak a ngai tih a sawi.
“Thau lutuk hi ram fit leh hrisel neihna tura harsatna siamtu a ni dawn,” a ti a ni.
Thau lutuk hi mihringa harsatna thlentu tam ber zinga mi niin lung natna pawh a thlen thei a. Ruh hriselna leh chi thlah a khawih thei a, cancer pawh an nei hma bik.