Japan lakah South Korea tlawm ngam

South Korea leh Japan hruaitu lawk te chu Ningani khan Tokyo-ah inhmuhna neiin hei hi ram pahnih inlaichinna bumboh taka ‘chhinchhiahtlak’ tia sawi a ni a. North Korea in karkhat chunga missile pali a kahchhuah hnu lawka neih a ni.
Inbiakna a awm theih nan hian South Korean President Yoon Suk Yeol chuan hma a lak vang tia sawi a ni a. Tun hi kum 12 chhunga Tokyo in South Korean leader inbiakna nei tura a sawm tum khatna a ni hial.
Ram pahnihte inlaichinna hi inthenawm mai mah nise kum tam tak chhung chu duhawm lo tak mai a ni a. South Korea hi Japan chuan kum 1910 atang khan World War Two tawp thlen khan a awp char char a. Japanese sipaite chuan Koreans sang tam tak te chu mines leh factory ah hna an thawhtir lui a, hmeichhia te chu nawhchizawrhluih tir an ni bawk.
He hun thim leh sernung hi langthar viau thin kher lo mah se, theihnghilhin a awm ngai lo va, ngaihdam a ni ngai hek lo.
Mahse, kar kalta khan South Korean President Yoon chuan Japan chuan sala a chhawr tawhte zangnadawmna a pe tur a ni tia an lo phut tawh chu thlauhthlain South Korea sorkar chuan heng sala chhawrte hi zangnadawmna a pe mai ang a ti a. Chu chu northeast Asia security tha awm se duhna vang liau liau tiin a sawi.
South Korea opposition leader thung chuan ‘kan history a mualphona lian ber’ tiin a sawi thung a. Mahse, President Yoon chuan Tokyo a pan tho a, diplomats te pawhin mak an tiin tha an ti tia sawi a ni bawk a. Huaisenthlak leh finthlak tiin foreign policy tawnhriat pawh nei lo hmalakna atan chuan mak tih a tling a. Mahse, Yoon hi lawyer a ni hrim hrim bawk.
President nihna a chelh hnuah a foreign policy chu inzawmna siamthatlehna lam hawi hlirin a kalpui a. Nuclear-armed North Korea hlauhawm tial tial nen Seoul chuan Tokyo nena intelligence inhrilhtawna thawh dun chu tihmakmawhah a ngai a ni.
Chu mai bakah President Yoon chuan US tihlawm a duh bawk a, chu chu China lian leh sang zel dan nana ngaiah a ngai bawk. US President Joe Biden chuan Yoon-an Japan nena inremsiamna neih a tum chu ‘bungthar kaina duhawm’ tiin a sawi a. A tuk lawkah Biden chuan Yoon chu White House tlawh turin sawmna a thawn zui nghal hial a ni.
Yoon chuan South Korea chu khawvelah chapter thar kaipui a tum bawk a. North Korea nena buaina piah lam thlirin Indo-Pacific piah lamah South Korea chuan nasa zawka awmzia neih a duh a ni. Hei vang hian Japanese Prime Minister Fumio Kishida chuan May thlaa Hiroshima a G7 summit neih hunah tel ve turin a sawm dawn tia sawi a ni bawk.
Japan nena inzawmna siamthat chuan economic lamah pawh hlawkna thlen dawnin kum 2019 khan ram pahnih inlaichinna a chhe hle a. Japan chuan Seoul in semi-conductor siam nan bera a hman chemical a thawnluh chu a khuahkhirh a, chu khuahkhirhna hlih chu Yoon sorkar chuan ngaih pawimawh bera a neih tia sawi a ni bawk.
Yoon hmalakna hmangin Japan lakah South Korea chu tlawm zawk angin a langa ngaih a ni a. Senior diplomat pakhat chuan South Korea chuan lamtual a pan a, mi tin hmuh theihah lam thai nghalin a thenawm te chu zawm ve turin a sawm a, Japan chuan a remti a, a lam zui ve a, mahse, South Korea chuan beisei dang a nei zel a ni, a ti.
South Korean leader hian Tokyo a tlawhnaah high-level talks a nei zut dawn a. Yoon Suk Yeol chuan a tui tih ber “omurice”, fried rice leh omelette a ei ngei dawn tiin Japan tualchhung media te chuan an sawi bawk a.
Japan chanchinbu Yomiuri newspaper chuan Fumio Kishida chuan Yoon hi restaurant lar tak Rengatei-ah summit an neih zawh hnuah hruai a tum an ti bawk a.
“Going the extra-mile” tih chu media report thenkhat tarlan dan niin social media thenkhatah erawh “Omurice diplomacy” tiin an sawi thung.
Ram pahnih te hian inzawmna an neih that avangin hlawkna an tel ve ve dawn tih a chiang a, Japan tan pawh strategic leh diplomatic lama hlawhtlinna tling tur a ni a. Khawvela economy lian ber pathumna hian May thlaah Hiroshima-ah G7 summit a thleng dawn bawk a.
Chutah chuan North Korea leh China hlauhawmna chu sawi ngei tura ngaih a ni a. South Korea nena inlaichinna tha chuan Japan chu huaisenna nasa zawk a pek belh ngei dawna ngaih a ni bawk a. Chumai bakah US tan pawh thil tha niin Tokyo chuan Washington chu a laka rinna a la nghat zui zel thei a tihna a ni bawk tia sawi a ni.
Yoon hi kum 2019 hnua South Korean president Tokyo tlawh leh hmasa ber tur niin, ram pahnih inlaichinna hi Japan in Korean peninsula a awp lai atang tawha chhia a ni. Tun hnaiah Tokyo in smartphone displays, TV screen leh semiconductor siamna high-tech material leh chemical thawnchhuah a khuahkhirh zui avangin ram pahnih inlaichinnain a tawrh phah bawk a.
South Korea-in thla kaltaa Japan nena harsatna an neihte chinfel tumin hma a lak tur thu a puang chuan phurna thar siamin bungthar kaina tur tia sawi a ni bawk. Japan PM Kishida pawhin lawmawm tiin Foreign Minister Yishimasa Hayashi pawhin lawmawm a tih thu a sawi nghal bawk.
Japan leh South Korea inzawmna tha hi US tan pawha pawimawh tawp a ni a. Pyongyang chuan missile siamin a chak tial tial a, nuclear weapons test tumin a inpuahchah mup mup reng bawk a.
China chuan helai region ah thuneitu ber nih tumin a inla lian zel a, Solomon Island-ah te hial pawh military base din tumin hma a la a, hei hi China-in pha mahse ni ngeia ngaih niin Washington chuan Asia-Pacific tana hlauhawm a ti.
Thla kalta khan US chuan Chinese spy balloon a kapthla a, Japan pawhin kum 2019 atang khan Chinese spy balloon ni ngeia a ngaih pathum an ram chhungah an hmuh tawh thu a puang zui bawk a.
Japan chuan China chuan Taiwan chu lak tumin a hnaih tial tial tia sawi bawkin chutih laiin Beijing chuan Ukraine indonaah tan lam nei lo inti mahse Russia chu a thlawp hnai tial tial a, a langsar tial tial an ti bawk.
Japan leh South Korea te hian history duhawm lo tak nei mahse regional security tha duhna avangin hma lam hun chiang lo hmachhawn dun an thlang dun zawk dawn ta nia ngaih a